Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 280 Hüküm no: 283 Orijinal metin no: [62b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Franko’nun vârislerinin miras işlemlerini yapmak üzre Dimo v. Franko’ya vekâlet vermeleri Vilâyet-i Rumeli’nde Gerbeniş kazâsına tâbi‘ İstarye nâm karye sükkânından olup bundan akdem medîne-i Ebâ Eyyûb el-Ensârî -dâme fî rıdvâni’l-Bârî-’de vâki‘ Çömlekçiler çarşısında mütemekkin iken mürd olan Yani v. Franko nâm hâlikin verâseti, zevce-i metrûkesi Kali bt. Mihal nâm nasrâniye ile vâlidesi İstamo bt. ( ) nâm nasrâniyeye ve sulbiye kızları İstamo ve Kogo nâm sagīrelere munhasıra idiği şer‘an zâhir ve müte‘ayyin oldukdan sonra merkūmetân İstamo ve Kogo taraflarından husûs-ı câ’i’z-zikri taleb ve da‘vâya ve sulh ve ibrâya vekîl olan işbu râfi‘ü’s-sifri’ş-şer‘î hâlik-i mezbûrun li ebeveyn karındaşı Dimo v. Franko nâm zimmî vech-i âtî üzre da‘vâ-yı sahîha-i şer‘iyye ile mesbûk istişhâd-ı şer‘î sudûrundan sonra karye-i mezbûre sâkinlerinden Yorgi v. Keretsi ve Yani v. Panayot nâm zimmîler mahall-i cerh ve ta‘dîle li ecli’ş-şehâde hâzırân olup her biri edâ-i şehâdet-i şer‘iyye edip medîne-i mezbûrede mütemekkin iken mürd olan merkūm Yani’nin eyâdî-i nâsda olan hakkını da‘vâ ve taleb ve ahz ü kabza ve lede’l-hükkâmı zevi’l-ihtirâm mürâfa‘a ve muhâsamaya ve şer‘an zuhûr eden hisselerini ahz ü kabza ve kendilere îsâle ve ahz ü kabz ve îsâl mütevakkıf olduğu umûrun küllîsine müsteşhid-i mezbûr Dimo’yu bizim huzûrumuzda taraflarından vekîl ve nâib-i menâb nasb ve ta‘yîn eylediklerinde ol dahi vekâlet-i mezbûreyi kabûl ve hıdemât-ı lâzımesini edâya müte‘ahhid olmuşdur. Biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde merkūmânın şehâdetleri makbûle olmağın mâ hüve’l-vâki‘ bi’t-taleb kayd şüd. Fi’l-yevmi’s-sâdis ve’l-ışrîn min Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Hüseyin Muhzır, Mehmed Beşe Çukadâr, Mehmed b. Ahmed Muhzır, Hasan b. Abdullah muhzır ve Dimo v. Todori, Dimo v. Yorgi, Keretsi v. İstati, Yorgi v. İstati, Yani v. Panayot ve gayruhüm mine’l-hâzırîn.