Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 296 Hüküm no: 303 Orijinal metin no: [67a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tolko v. Panço’nun bağını Kostanti v. Gogo’ya satması Vilâyet-i Rumeli’nde Hurpişte kazâsına tâbi‘ Novosel nâm karye zimmîlerinden Tolko v. Panço nâm zimmî meclis-i şer‘de işbu râfi‘ü’l-vesîka Kostanti v. Gogo nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olan emlâkimden yine kazâ-i mezbûra iktâ‘ından Trastika nâm karye sınırı dâhilinde vâki‘ bir tarafdan Emrullah b. Mehmed bağı ve bir tarafdan Sinan bağı ve tarafeyni arsa-i hâliye ile mahdûd tahmînen dört çubukluk bir kıt‘a mülk bağımı cemî‘ tevâbi‘ ve levâhıkı ile mesfûr Kostanti’ye yedi yüz fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î bâtten bey‘ edip ol dahi vech-i muharrer üzre iştirâ ve kabûl edip semeni olan meblağ-ı mârrü’z-zikri bi’t-tamâm ve’l-kemâl müşterî-i merkūm Kostanti yedinden alıp kabz edip bağ-ı mahdûd-ı mezkûru mahallinde ahz ü kabz ve zabt u tasarrufa tarafımdan merkūm Kostanti’yi taslît eyledim ba‘de’l-yevm zikr olunan bağ ve içinde mevcûd olan elma ağacı ve sâir tevâbi‘ ve levâhıkında kat‘an benim alâkam yokdur, müşterî-i mezbûrun mülk-i müşterâsı ve hakk-ı sarîhidir, keyfe mâ yeşâ’ mutasarrıf olsun dedikde gıbbe’t-tasdîki’ş-şer‘iyyi’l-mu‘teber mâ hüve’l-vâki‘ kayd şüd. Fi’l-yevmi’s-sâdis min Zilka‘deti’ş-şerîfe li seneti isneteyn ve seb‘în ve elf. Şuhûdü’l-hâl: Mustafa Beşe b. Abdullah er-Râcil, Hüseyin b. Ebûbekir, Süleyman Beşe b. Mustafa, Mehmed b. Mahmud, Ali Beşe Çukadâr ve gayruhüm mine’l-hâzırîn.