Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 297 Hüküm no: 304 Orijinal metin no: [67a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eğri’de şehit düşen Şeyh Hızır’ın kızı Kerime Hatun’un, vekili Seyyid Abdülkerim Efendi b. Seyyid Şaban’ın zimmetini ibrâ etmesi Husûs-ı âti’z-zikri mahallinde tahrîr için bi’t-taleb irsâl olunan mevlânâ Sâlih Mehmed Efendi b. Mehmed, zeyl-i kitâbda muharrerü’l-esâmî olan müslimîn ile medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Baba Haydar-ı Nakşibendî mahallesi sâkinelerinden fahrü’l-muhadderât zahrü’l-muvakkarât Kerime Hâtun bt. el-merhûm sa‘îdü’l-hayât şehîdü’l-memât eş-Şeyh Hızır Efendi’nin sâkine olduğu menziline varıp akd-i meclis-i şerî‘at-ı şerîfe eylediğinde mûmâ-ileyhâ Kerime Hâtun meclis-i ma‘kūd-ı mezkûrda, işbu kitâb-ı sıhhat-nisâbın sâhibi fahrü’s-sâdât mazharü’s-sa‘âdât es-Seyyid Abdülkerim Efendi b. es-Seyyid Şaban mahzarında bi’t-tav‘ ve’r-rızâ ikrâr ve takrîr-i kelâm edip bundan akdem mûmâ-ileyh es-Seyyid Abdülkerim Efendi beynimizde ma‘lûm nice ahz u i‘tâ ve mu‘âmelât-ı şettâda tarafımdan vekîl olup nice mesâlihimi görüvermişdi el-hâletü hâzihî beynimizde hesâb ve kitâb olunup mûmâ-ileyh es-Seyyid Abdülkerim Efendi zimmetinde bir akçe ve bir habbe hakkım bâkī kalmamışdır min ba‘d mûmâ-ileyh es-Seyyid Abdülkerim Efendi ile vechen mine’l-vücûh ve sebeben mine’l-esbâb da‘vâ yokdur, zuhûr dahi ederse lede’l-hükkâmi’l-kirâm mesmû‘a ve makbûle olmasın deyicek gıbbe’t-tasdîki’l-mu‘teber vâki‘ü’l-hâli mevlânâ-yı mezbûr mahallinde tahrîr, ba‘dehû meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis min Zilka‘deti’ş-şerîfe li seneti isneteyn ve seb‘în ve elf. Şuhûdü’l-hâl: eş-Şeyh Abdullah Efendi b. İsâ el-Halvetî, Halil Halîfe b. ( ) el-Müezzin, Kenan Halîfe müezzin-i Avcıbey, Şaban b. Mehmed er-Râcil, Mustafa Beşe b. Kaytas er-Râcil ve gayruhüm mine’l-hâzırîn.