Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 308 Hüküm no: 316 Orijinal metin no: [70a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi ve Mehmed Çelebi b. Mehmed’in Emânî Çelebi Vakfı’na menzillerini bey‘ bi’l-istiğlâl yoluyla sattıkları Mahmiye-i İstanbul hısnı ebvâbından Topkapısı hâricinde vâki‘ Emânî Çelebi mahallesi sükkânından Mustafa Çelebi ve Mehmed Çelebi ibney Mehmed nâm karındaşlar meclis-i şer‘-i hatîr-i lâzımü’t-tevkīrde mezbûr Emânî Çelebi[’nin] vakf eylediği nukūda bi’l-fi‘l mütevellî olan râfi‘ü’l-kitâb Abdülaziz Çelebi b. Sinan mahzarında her biri ikrâr ve takrîr-i kelâm edip emlâkimizden olup mahalle-i mezbûrede vâki‘ bir tarafdan Mehmed Çelebi mülkü ve bir tarafdan mahalle-i mezbûre müezzinine meşrûta olan vakıf menzil ve tarafeyni tarîk-i âm ile mahdûd olan bir fevkānî oda ve bir sofa ve tahtında ahırı ve iki tahtânî odaları ve bir matbah ve bir çatma oda ve bir kileri ve bir su kuyusunu ve zât-ı eşcâr-ı müsmire ve gayr-ı müsmire bahçeyi müştemil ale’l-iştirâk mülk-i mevrûs menzilimizi, cümle-i tevâbi‘ ve levâhıkı ile mütevellî-i mezbûra alâ tarîki’l-istiğlâl her biri yedişer dirhem olmak üzre elli altı kıt‘a riyâlî guruşa bey‘ ve teslîm eylediğimizde ol dahi mâl-ı vakf-ı mezbûr ile tarîk-i mersûm üzre iştirâ ve tesellüm ve kabz ve kabûl eyleyip semeni olan mezbûrü’n-na‘t elli altı kıt‘a guruşu mütevellî-i mezbûr Abdülaziz Çelebi yedinden tamamen ale’l-iştirâk ahz ü kabz eylediğimizden sonra yine mütevellî-i mezbûr menzil-i mahdûd-ı mezkûru ba‘de’t-tahliyyeti’ş-şer‘iyye târih-i kitâbdan bir sene tamâmına değin beher guruşu yedişer dirhem olmak üzre sekiz kıt‘a riyâlî guruş ile bir rub‘ guruş ücret ile bize îcâr ve teslîm eylediğinde biz dahi ber vech-i iştirâk minvâl-i meşrûh üzre istîcâr ve tesellüm ve kabz ve kabûl eyledik dediklerinde gıbbe’t-tasdîki’l-mu‘teber mâ hüve’l-vâki‘ kayd şüd. Fi’l-yevmi’s-sâbi‘ min Zilka‘deti’ş-şerîfe li seneti isneteyn ve seb‘în ve elf. Şuhûdü’l-hâl: Yusuf Efendi b. Abdünnebî, Mehmed Efendi el-İmâm, Mehmed Efendi b. Yusuf el-Müezzin, Hasan Halîfe b. Mehmed, Mehmed Çelebi b. Hüseyin ve gayruhüm mine’l-hâzırîn.