Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 322 Hüküm no: 330 Orijinal metin no: [73b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Beşe b. Abdullah ile kızı Emine ve karısı Fâtıma’nın akrabaları Mehmed tarafından yaralandıklarının tespiti Havâss-ı Aliyye kazâsına tâbi‘ Terkos nâhiyesi a‘mâlinden Çiftalan nâm karyede sâkin hâlâ sağ omuzu başında ve başında harbe yarasıyla mecrûh olan Ali Beşe b. Abdullah ve sol elinin iki parmağı kat‘ olunmağla mecrûha olan sulbiye kebîre kızı Emine ve arkasında ve sağ elinde harbe yarasıyla mecrûha olan zevcesi Fâtıma bt. Ferhad meclis-i şer‘-i şerîfde yine karye-i mezbûre ahâlîlerinden Mustafa Beşe b. Ömer ve Himmet b. Maksud ve Hasan b. Abdullah ve Hüseyin b. Abdullah ve Yusuf b. Abdullah ve sâirleri mahzarlarında her biri ikrâr-ı tâm ve takrîr-i kelâm edip târih-i kitâbdan bir gün mukaddem akrabâmızdan gāib ani’l-meclis Mehmed b. Abdullah nâm kimesne karye-i mezbûrede bizi bi gayri hakkın harbe ile darb ve her birimizi mecrûh edip firâr etmiş el-hâletü hâzihî ahâlî-i karye-i mezbûreden cârih-i merkūm Mehmed’den gayrı bir ferd ile husûs-ı mezbûra müte‘allik da‘vâ ve nizâ‘ımız yokdur, eğer bu cerâhatlerin bi emrillâhii te‘âlâ fevt olursak dem ve diyetimizi cârih-i merkūm Mehmed’den taleb ve da‘vâ olunsun, husûs-ı mezbûra müte‘allik âmme-i da‘vâdan ahâlî-i karye-i mezbûrenin zimmetlerini ibrâ ve iskāt eyledik dediklerinde gıbbe’t-tasdîk mâ hüve’l-vâki‘ kayd şüd. Fi’l-yevmi’r-râbi‘ aşer min Zilka‘deti’ş-şerîfe li seneti isneteyn ve seb‘în ve elf. Şuhûdü’l-hâl: Hamza Efendi b. Hasan nâib-i recül, Ali Beşe b. Pervâne, es-Seyyid Mehmed Efendi b. es-Seyyid Mustafa, Mustafa b. Ahmed ve gayruhüm mine’l-hâzırîn.