Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 306 Hüküm no: 345 Orijinal metin no: [45b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Kaba Kondelko’nun beytülmâl tarafından el konulan terekesinin vârislerine verilmesi Vilâyet-i Rumeli’nde Ruskasrı kazâsına tâbi‘ Karapınar nâm karye sâkinelerinden Rago bt. Dobre nâm nasrâniyenin zevci olup tarafından husûs-ı âti’l-beyâna vekâlet iddi‘â eden râfi‘ü’s-sifr Yani v. Yanaki nâm zimmî meclis-i şer‘-i şerîf-i Ahmedî ve mahfil-i dîn-i münîf-i Muhammedî’de fi’l-asl karye-i mezbûreden olup mahmiye-i İstanbulda âmme beytülmâl emîni olup vilâyet-i mezbûrede Kızılağaç kazâsına tâbi‘ Gedikli nâm karyede tavattun ettikden sonra sürekçilik ile mahmiye-i mezbûreye geldikden sonra Yedikule’de hâlik olan Kaba Kondelko nâm zimmînin vâris-i ma‘rûfu olmamak zu‘mu ile terekesine vâzı‘ü’l-yed olan ümdetü’l-eşbâh Mahmud Ağa b. Hasan tarafından husûs-ı âti’l-beyâna vekîl olduğu bimâ hüve tarîkü’s-sübût şer‘an sâbit olan Ebûbekir Ağa b. Abdurrahman nâm kimesne mahzarında da‘vâ ve takrîr-i kelâm edip hâlik-i mezbûr ile mezbûre Rago li eb karındaşlar olup babaları ismi Dobre ve maskat-ı re’sleri zikr olunan Karapınar karyesi olup hâlik-i mezbûrun verâseti mezbûre Rago ile li eb karındaşları Kirço nâm zimmîye münhasıra olup ve mezbûre Rago hâlik-i mezbûrun terekesinden sülüs hissesini vâzı‘ü’l-yed olanlardan ahz u kabza ve kendiye îsâle ve kabz ve îsâl mütevakkıf olduğu umûrun küllîsine tarafından beni vekîl etmekle suâl olunup tereke-i hâlik-i mezbûrun sülüsünü bana teslîme mezbûr Ebûbekir Ağa’ya tenbîh olunmak matlûbumdur dedikde, gıbbe’s-suâl mezbûr Ebûbekir Ağa müvekkilinin vech-i muharrer üzre tereke-i hâlik-i mezbûra vaz‘-ı yedini ikrâr ve lâkin vech-i muharrer üzre müdde‘î-i mezbûrun vekâletini ve mezbûre Rago’nun verâsetini inkâr edicek müdde‘î-i mezbûrdan müdde‘âsını mübeyyine beyyine taleb olundukda zikr olunan Kızılağaç kazâsına tâbi‘ Demircili nâm karye ahâlîsinden Ahmed b. Mahmud ve vilâyet-i mezbûreden kasaba-i Karinâbâd’da Câmi‘-i Sagīr mahallesi ahâlîsinden Hacı Halil b. Sinan nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka hâlik-i mezbûr ile mezbûre Rago li eb karındaşlar olup babaları ismi Dobre ve maskat-ı re’sleri zikr olunan Karapınar karyesidir, hâlik-i mezbûrun verâseti mezbûre Rago ile li eb karındaşı mezbûr Kirço’ya münhasıradır gayrı vârisi ve terekesine âhar müstahık olduğu ma‘lûmumuz değildir ve mezbûre Rago tereke-i hâlik-i mezbûrdan hisse-i şer‘iyyesi vâzı‘ü’l-yed olanlardan ahz u kabza ve kendiye îsâle ve kabz ve îsâl mütevakkıf olduğu umûrun küllîsine tarafından zevci mezbûr Yani’yi mukaddemâ huzûrumuzdan vekîl ve menâbına nâib nasb ve ta‘yîn edip ol dahi vekâlet-i mezbûreyi kabûl ve merâsimini edâya ta‘ahhüd etmişidi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince vech-i muharrer üzre mezbûre Rago’nun verâsetine ve mezbûr Yani’nin vekâletine hükm olundukdan sonra tereke-i hâlik-i mezbûrun sülüsünü vekîl-i mezbûr Yani’ye teslîme mezbûr Ebûbekir Ağa’ya tenbîh olunmağın mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Edhem Çelebi b. Mustafa, Şaban Ağa Ser-muhzırân, Mehmed Çelebi b. Abdülmennân Kethüdâ-yı muhzırân, Mustafa b. Kenan, Ömer Ağa b. Mustafa, Ahmed Çelebi b. Mahmud.