Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 305 Hüküm no: 344 Orijinal metin no: [45a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hanım bt. Mervan Ali’nin tasarrufu babasından intikal eden vakıf değirmenlerle ilgili kira sözleşmesi Mahmiye-i İstanbul’da Mi‘mâr Sinan mahallesi sâkinelerinden Fâtıma Hanım bt. Mervan Ali Bey nâm hâtun tarafından husûs-ı âti’l-beyâna vekîli olduğu zâtını ma‘rifet-i şer‘iyye ile ârifân İvaz b. Süleyman ve Seyfullah b. Abdullah nâm kimesne şehâdetleriyle şer‘an sâbit olan Ali Efendi b. Mehmed nâm kimesne meclis-i şer‘-i şerîf-i lâzımü’t-teşrîfde bi’l-vekâle ikrâr ve takrîr-i kelâm edip merhûm es-Seyyid Mahmud Efendi nâm sâhibü’l-hayr vilâyet-i Anadolu’da medîne-i Kayseriye kazâsında Emirdar? nâm karyede binâ ve vakf-ı lâzım ile vakf eylediği beyne’l-ahâlî ve’l-cîrân ma‘lûmü’l-hudûd on kıt‘a değirmenlerin tevliyyet ve gallesini evlâdına ve evlâd u evlâdına şart edip ba‘de zamân ol değirmenler bi’l-külliye harâb olup elli sene arsası hâlî ve mu‘attal kalıp ba‘dehû bin elli senesinde evlâddan meşrûtiyyet üzre mütevellî olan es-Seyyid Mustafa Efendi ve es-Seyyid Ahmed Çelebi zikr olunan değirmenlerin yerlerini müvekkilem mezbûrenin babası mezbûr Mervan Ali Bey’e beş bin akçe icâre-i mu‘accele ve senede bir guruş icâre-i müeccele ile îcâr ve teslîm edip ol dahi istîcâr ve kabûl eyledikden sonra mezbûr Mervan Ali Bey arsa-i mezbûrenin üzerine mülkü olmak üzre izn-i mütevellî ile müceddeden değirmenler binâ edip mutasarrıf iken mezbûr Ali Bey fevt olup kızı müvekkilem mezbûre Fâtıma Hanım’a intikāl etmişidi, lâkin zikr olunan değirmenlerin arsasının ecr-i mislini ziyâde alıp hâlâ evlâddan mütevellîsi olan es-Seyyid Abdülkerim Çelebi dahi müvekkilem mezbûre Fâtıma Hanım’a ecr-i mislini tekmîl eyle deyû teklîf eylediğinde [45b] müvekkilem mezbûre Fâtıma Hanım dahi hâlâ mütevellî olan mezbûr es-Seyyid Abdülkerim Çelebi’ye vakf için vech-i muharrer üzre zikr olunan değirmenlerin icâre-i mu‘accelesi için yüz on esedî guruş ve icâre-i müeccelesi için beher sene beş müd buğday ve bir müd arpa vermek üzre zikr olunan değirmenlerin ecr-i mislini tekmîl edip mezbûr es-Seyyid Abdülkerim Çelebi dahi kabûl edip râzı oldukdan sonra müvekkilem mezbûre Fâtıma Hanım’ın yedine temessük vermişidi, nazar olunup mûcebince cânib-i şer‘den li ecli’l-istihkâm hüccet verilmek murâdımdır deyû mütevellî-i mezbûrun hat ve hatmini hâvî mazmûn-ı takrîr-i meşrûhu nâtık temessük ibrâz etmeğin mûcebince li ecli’l-istihkâm taraf-ı şer‘den bu vesîka-i enîka ketb ve terkīm olunup yed-i tâlibe def‘ olundu. Fi’l-yevmi’s-sânî ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: İshak Efendi b. Yusuf, Kadri Efendi b. Ahmed, Muharrem Efendi b. Derviş Ali, İsmail Çelebi b. ( ), es-Seyyid Abdülfettâh Efendi, es-Seyyid Sâlih Efendi.