Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 330 Hüküm no: 340 Orijinal metin no: [75b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yuvan v. Mitre’nin öldürülen kardeşi çoban Balaban’da olan alacağının terekesinden ödenmesi Çoban tâifesinden işbu bâ‘isü’r-rakīm Yuvan v. Mitre nâm zimmî mahfil-i kazâda hâlâ beytülmâl-i âmme emîni olan fahrü’l-eşbâh Mehmed Ağa b. Mehmed nâm kimesne mahzarında üzerine da‘vâ ve takrîr-i kelâm edip Havâss-ı Aliyye kazâsına tâbi‘ Topçular nâm karye kurbunda Çiço Çiftliği demekle ma‘rûf çiftlik yanında koyun geçesi kurbunda bundan akdem katîlen hâlik olan Balaban v. Mitre nâm zimmînin koyunlarını ve sâir metrûkâtı vâris-i ma‘rûfu olmamak zannıyla emîn-i mûmâ-ileyh mîrî için zabt ve vaz‘-ı yed etmişdi lâkin ben hâlik-i mezbûrun li eb ve üm karındaşı olduğumdan mâ‘adâ cihet-i karz-ı şer‘îden hâlik-i mezbûr Balaban zimmî zimmetinde on iki bin fıddî nakd-i râyic fi’l-vakt akçe hakkım olup kable’l-edâ katîlen hâlik olmağla zimmetinde kalmışdı el-hâletü hâzihî hâlik-i merkūmun metrûkât-ı vâfiyesinden meblağ-ı mezbûrun alıverilmesi matlûbumdur deyicek gıbbe’s-suâl emîn-i mezbûr hâlik-i merkūmun metrûkâtına vaz‘-ı yedini ikrâr, lâkin müdde‘î-i mezbûrun hâlik-i merkūm zimmetinde ber minvâl-i muharrer on iki bin akçe deyni olduğunu inkâr ile cevâb vermeğin müdde‘î-i mezbûrdan müdde‘âsını mübeyyine beyyine taleb olundukda, medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-’de Bıçakçı Ferhad mahallesinde sâkin Musa b. Mehmed ve İslâm Bey mahallesinde sâkin Hüseyin b. Mehmed nâm kimesneler li ecli’ş-şehâde makām-ı kazâya hâzırân olup istişhâd olunduklarında, fi’l-hakīka hâlik-i mezbûr katl olunmazdan mukaddem bizim huzûrumuzda cihet-i karz-ı şer‘îden karındaşım Yuvan’a zimmetimde lâzımü’l-edâ on iki bin akçe deynim vardır deyû ikrâr ve bizi işhâd eylemişidi biz hâlik-i mezbûrun vech-i mübeyyen üzre ikrârına şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle oldukdan sonra meblağ-ı mezbûru küllen ve ba‘zan hâlik-i mezbûrdan ahz u istîfâ veya hibe ve yâhud âhara havâle veya taraf-ı şer‘iyyeden biriyle hâlik-i mezbûrun zimmetini ibrâ eylemediğine müdde‘î-i merkūm Yuvan’a yemîn teklîf olundukda, ol dahi alâ vefki’l-mes’ûl yemîn billâhi’llezî enzele’l-İncîle alâ İsâ -aleyhi’s-selâm- etmeğin mûcebiyle meblağ-ı mezbûru hâlik-i mezbûrun metrûkâtından müdde‘î-i merkūma edâ ve teslîme emîn-i merkūma tenbîh birle. mâ hüve’l-vâki‘ bi’t-taleb kayd şüd. Fi’l-yevmi’s-sâdis ve’l-ışrîn min Zilka‘deti’ş-şerîfe li seneti isneteyn ve seb‘în ve elf. Şuhûdü’l-hâl: Hasan Çavuş el-Mübâşir, çukadâr Ali Beşe, Hasan Muhzır, Mehmed Beşe b. Musli, (…) b. Abdullah, Mehmed Beşe b. Abdullah ve gayruhüm mine’l-hâzırîn.