Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 329 Hüküm no: 339 Orijinal metin no: [75b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Balaban v. Mitre’nin beytülmâl tarafından zabtolunan koyunlarının kardeşine teslim edildiği Fi’l-asl vilâyet-i Rumeli’nden Manastır kazâsına tâbi‘ Boristere? nâm karye sâkinlerinden olup hâlâ mahmiye-i İstanbul’da sütçü tâifesinden Yuvan v. Mitre nâm zimmî meclis-i şerî‘at-ı şerîfede hâlâ gümrük emîni olan fahrü’l-a‘yân Mahmud Ağa b. Hasan tarafından beytülmâl-i âmme zabtına memûr olup metrûkât-ı câ’i’z-zikre vaz‘-ı yedi ikrârıyla sâbit olan râfi‘ü’l-kitâb Mehmed Ağa b. Mehmed mahzarında ikrâr ve takrîr-i kelâm edip Havâss-ı Refî‘a -humiyet ani’l-âfet ve’l-beliyye- kazâsına tâbi‘ Topçular nâm karye kurbunda vâki‘ Çiço Çiftliği mukābelesinden bundan akdem mecrûhan maktûl bulunan li ebeveyn karındaşımız Balaban v. Mitre’nin metrûkâtından yüz yirmi re’s koyununu mûmâ-ileyh Mehmed Ağa karındaşım hâlik-i mezbûrun vârisi olmamak zu‘muyla mîrî için ahz ü kabz ve zabt edip hâlâ emîn-i mezbûr muvâcehesinde minvâl-i muharrer üzre verâsetimi isbât edip emîn-i mezbûr ber mûceb-i defter kabz ve vaz‘-ı yed eylediği mârrü’z-zikr yüz yirmi re’s koyunu bana def‘ u teslîme hükm-i hâkim-i lâhık olmağın emîn-i mezbûr Mehmed Ağa dahi karındaşım hâlik-i mezbûr Balaban’ın kabz ve vaz‘-ı yed eylediği yüz yirmi re’s koyunları tamamen bana def‘ u teslîm, ben dahi verâsetim hasebiyle alıp kabz eyledim ba‘de’l-yevm karındaşım hâlik-i mezbûrun metrûkâtına müte‘allik vechen mine’l-vücûh âmme-i de‘âvîden emîn-i mezbûr Mehmed Ağa’nın zimmetini ibrâ ve iskāt eyledim min ba‘d husûs-ı mezbûra müte‘allik da‘vâ ve nizâ‘ım yokdur deyû ikrâr ve i‘tirâf etmeğin mâ hüve’l-vâki‘ gıbbe’t-tasdîk ve’t-taleb kayd şüd. Fi’l-yevmi’s-sâbi‘ ve’l-ışrîn min Zilka‘deti’ş-şerîfe li seneti isneteyn ve seb‘în ve elf. Şuhûdü’l-hâl: Mehmed Ağa b. Ali tâbi‘-i Nâzır Ağa, Kethüdâ Receb Bey b. Hasan, çukadâr Mehmed Beşe, Ali Beşe b. Hasan ve gayruhüm mine’l-hâzırîn.