Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 332 Hüküm no: 343 Orijinal metin no: [76a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Veli Çelebi b. İsa’nın evini Şeyh Şaban Efendi Vakfı’na bey‘ bi’l-istiğlâl yoluyla satması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Kara Süleyman Çelebi mahallesi müezzini olan kâtib Veli Çelebi b. İsâ nâm kimesne meclis-i şer‘de hâlâ mahalle-i mezbûre imâmı olup merhûm Şeyh Şaban Efendi’nin mahalle-i mezbûre imâmına ve müezzinine vakıf ve gallesini şart eylediği nukūdun kāimmakām-ı mütevellîsi olan râfi‘ü’l-kitâb Mahmud Halîfe b. Mehmed mahzarında tav‘an ikrâr ve takrîr-i kelâm edip silk-i mülk-i sahîhimde münselik olan emlâkimden mahalle-i mezbûrede vâki‘ bir tarafı ammim oğulları Mehmed Çelebi ve Mustafa Çelebi mülkleri ve bir tarafı Hasan Çelebi mülkü ve iki tarafı tarîk-i hâs ile mahdûd mülk menzilimi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık mâl-ı vakf-ı mezbûr ile alâ tarîki’l-istiğlâl yüz kıt‘a tâmmü’l-vezn sahîhü’l-ayâr riyâlî kebîr guruşa bey‘ edip ol dahi mâl-ı vakf-ı mezbûr ile tarîk-i mezbûr üzre iştirâ ve kabûl eyledikden sonra semeni olan yüz kıt‘a riyâlî guruş-ı tâmmü’l-vezni vakf-ı mezbûr malından olmak üzre kāimmakām-ı mütevellî olan merkūm Mahmud Efendi yedinden tamamen alıp kabz eylediğimden sonra menzil-i mahdûd-ı mezkûru ba‘de’t-tahliyye ve’t-tekābuz târih-i kitâb şehri gurresinden her senesi onar kıt‘a tâmmü’l-vezn riyâlî guruşdan üç sene tamâmına değin otuz kıt‘a riyâlî guruş icâre ile kāimmakām-ı mütevellî olan mezbûr Mahmud Efendi bana îcâr ve teslîm, ben dahi vech-i muharrer üzre istîcâr ve tesellüm ve kabz ve kabûl eyledim dedikde gıbbe’t-tasdîki’l-mu‘teber mâ hüve’l-vâki‘ kayd şüd. Fi’l-yevmi’s-sâmin ve’l-ışrîn min Zilka‘deti’ş-şerîfe li seneti isneteyn ve seb‘în ve elf. Şuhûdü’l-hâl: İsâ Efendi b. Kalender, Hüseyin Dede el-Halvetî, Mustafa Çelebi b. Hüsameddin, Mehmed b. Mahmud, Hasan Halîfe b. İbrahim el-İmâm ve gayruhüm mine’l-hâzırîn.