Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 333 Hüküm no: 344 Orijinal metin no: [76a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ergiri v. Yorgi’nin bostanını Panayot v. Nikola’ya satması Fi’l-asl vilâyet-i Rumeli’nden Gerbeniş kazâsına tâbi‘ Pologo nâm karye sükkânından Ergiri v. Yorgi meclis-i şerî‘at-ı şerîfede işbu râfi‘ü’s-sifri’ş-şer‘î Panayot v. Nikola nâm zimmî muvâcehesinde bi tav‘ihî ikrâr ve takrîr-i kelâm edip bey‘-i câ’i’z-zikrin sudûruna değin silk-i mülk-i sahîhimde münselik olan emlâkimden olup karye-i mezbûre hudûdu dâhilinde vâki‘ bir tarafdan müşterî-i mezbûr Panayot mülkü ve iki tarafdan Kertesi mülkü ve taraf-ı râbi‘i tarîk-i âm ile mahdûd ve mümtâz olan bir kıt‘a mülk bostan yerimi, cümle tevâbi‘ ve levâhıkı ile merkūm Panayot’a dokuz yüz nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i kat‘î ile bey‘ eylediğimde ol dahi minvâl-i muharrer üzre iştirâ ve kabûl eyleyip semeni olan mezbûrü’n-na‘t dokuz yüz akçeyi müşterî-i mezbûr Panayot yedinden tamamen alıp kabz eylediğimden sonra sâlifü’z-zikr bir kıt‘a bostanı mahallinde ahz ü kabz [ve] zabt u tasarrufa tarafımdan mezbûr Panayot’u taslît eyledim ba‘de’l-yevm bostan-ı mahdûd-ı mezkûrda vechen mine’l-vücûh benim alâka ve medhalim yokdur, mezbûr Panayot’un mülk-i müşterâsıdır keyfe mâ yeşâ’ mutasarrıf olsun dedikde gıbbe’t-tasdîki’l-mu‘teber mâ hüve’l-vâki‘ bi’t-taleb kayd şüd. Fi’l-yevmi’s-sâmin ve’l-ışrîn min Zilka‘deti’ş-şerîfe li seneti isneteyn ve seb‘în ve elf. Şuhûdü’l-hâl: Hüseyin Beşe b. Hasan, Mehmed Çelebi b. Mustafa, Hasan b. Abdullah, Dilâver b. Abdullah el-Muhzır, Dimitri v. Ziro, Yani v. Nikola, İsteryanos v. Yani, Avir[o] v. Yorgi ve gayruhüm mine’l-hâzırîn.