Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 338 Hüküm no: 350 Orijinal metin no: [77b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülbâki b. Sinan’ın babasından intikal eden miras hususunda üvey annesi Ayşe bt. Ali ile sulh olması Havâss-ı Refî‘a kazâsı tevâbi‘inden Karfa nâm karyede sâkin iken bundan akdem vefât eden Sinan b. Hüseyin nâm müteveffânın verâseti zevce-i metrûkesi Ayşe bt. Ali nâm hâtun ile sulbî kebîr oğlu Abdülbâkī ve sulbiye-i kebîre kızı Rahime’ye münhasıra olup kable’l-kısme mezbûre Rahime dahi fevt olup verâseti vâlidesi mezbûre Ayşe ile li eb karındaşı merkūm Abdülbâkī’ye münhasıra olduğu şer‘an zâhir ve bi hükmi’l-münâsahati’ş-şer‘iyye tashîh-i mes’eleleri yetmiş iki sehimden farz ve i‘tibâr olunup sihâm-ı mezkûreden on altı sehmi bi’l-irsi’ş-şer‘î merkūme Ayşe’ye elli altı sehmi mersûm Abdülbâkī’ye isâbet ve intikāl eylediği hâkim-i muvakki‘-i sadr-ı kitâb huzûrunda müte‘ayyin ve mütehakkik oldukdan sonra mezbûr Abdülbâkī meclis-i şer‘-i kavîm-i lâzımü’t-tevkīrde işbu râfi‘ü’l-vesîka mezbûre Ayşe mahzarında ikrâr-ı tâm ve takrîr-i kelâm edip mûrisim babam müteveffâ-yı evvel-i mezbûr Sinan’ın karye-i mezbûrede vâki‘ lede’l-ahâlî ve’l-cîrân ma‘lûmetü’l-hudûd mülk menzilini ve yine karye-i mezbûre sınırı dâhilinde mevâzi‘-i metrûkede vâki‘ her birinin hudûdu inde’l-ahâlî ma‘lûme üç bağını bâlâda bast ve tahrîr olunduğu üzre alâ mâ farazallâhu te‘âlâ tevzî‘ ve taksîm için cânib-i şerî‘at-ı mutahharadan mevlânâ Sâlih Mehmed Efendi nâib ta‘yîn ve irsâl olunup ol dahi menzil-i mezkûr ve mârrü’z-zikr bağları misâha ve takvîm için buyruldu-yı şerîf ile memûr olan hâssa mi’mârlardan Ali Beşe b. Abdullah ve zeyl-i vesîkada muharrerü’l-esâmî olan müslimîn ile karye-i mezbûreye gelip mi‘mâr-ı mezkûr menzil-i merkūm ve sâlifü’z-zikr bağları misâha ve takvîm ve her birimizin hissesini minvâl-i muharrer üzre ta‘yîn ve tahsîs eylediklerinden sonra beynimizde muslihûn tavassut edip karye-i mezbûre sınırı dâhilinde Kızıltoprak nâm mahalde vâki‘ tûlen yüz zirâ‘ ve arzen dahi yüz zirâ‘ bi hesâbı terbî‘î on bin zirâ‘ bir kıt‘a bağ mezbûre Ayşe’nin olup mâ‘adâ menzil-i mezbûr ve menzil kurbunda olan altı bin iki yüz zirâ‘ bir kıt‘a ve yine Kösecbağ demekle ma‘rûf altı bin iki yüz kırk bir zirâ‘ bir kıt‘a ki cem‘an iki kıt‘a bağlar dahi benim olduğundan mâ‘adâ mezbûre Ayşe bana üç bin fıddî nakd-i râyic-i fi’l-vakt akçe vermek üzre mezbûre Ayşe ile beni inşâ-i akd-i sulh eylediklerinde ben dahi sulh-i mezbûru kendi rızâ ve hüsn-i ihtiyârım ile kabûl eylediğimde mevlânâ-yı mezbûr vâki‘ hâli mahallinde tahrîr etmişdi lâkin hîn-i sulh-i mezbûrda bağ-ı merkūmun koruğu zikr olunmamağla, hâlâ mârrü’z-zikr bağda olan korukdan hisse-i şer‘iyyemi mezbûre Ayşe’den taleb ve da‘vâ eylediğimde tekrâr beynimizde muslihûn tavassut edip da‘vâ-yı mezkûrumdan mezbûre Ayşe ile beni üç yüz nakd-i râyic fi’l-vakt akçe üzerine ve babam müteveffâ-yı mezbûr ve hemşîrem müteveffât-ı mezbûrenin sâir nukūd ve menkūlât ve elbiselerinden ki mezbûre Ayşe vaz‘-ı yed etmişdir bana isâbet ve intikāl eden hisse-i şer‘iyyem da‘vâsından dahi yedi yüz akçe üzerine inşâ-i akd-i sulh eylediklerinde ben dahi sulh-i mezbûru kabûl ve cem‘an zikr olunan dört bin akçeyi üvey vâlidem mezbûre Ayşe yedinden tamamen alıp kabz edip âmme-i de‘âvî ve mütâlebâtdan zimmetini ibrâ ve iskāt eyledim min ba‘d bağ-ı mezkûr merkūme Ayşe’nin mülk-i mevrûsudur, keyfe mâ yeşâ’ mutasarrıf olsun dedikde gıbbe’t-tasdîki’l-mu‘teber mâ hüve’l-vâki‘ kayd şüd. Fî evâhiri Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Yahya Çelebi b. Mehmed el-İmâm, Hüseyin Bey b. Abdullah, Ahmed Çavuş b. Mustafa el-Mübâşir, Es-Seyyid Mehmed b. es-Seyyid Mustafa, Receb Çelebi b. Mustafa ve gayruhüm mine’l-hâzırîn.