Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 339 Hüküm no: 351 Orijinal metin no: [77b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belkıs bt. Abdullah’ın Ayşe bt. Eyüb ile miras hususunda anlaşması Mahmiye-i İstanbul’da Ahırkapı’da vâki‘ Kabasakal mahallesinde sâkin iken, bundan akdem intikāl-i dâr-ı bekā eden Eyüb Ağa merhûmun verâseti, halîlesi Belkıs Hâtun bt. Abdullah ile sulbiye-i kebîre kerîmeleri Ayşe Hâtun’a münhasıra olduğu şer‘an zâhir ve müte‘ayyin olduğundan sonra mûmâ-ileyhâ Belkıs Hâtun tarafından ikrâr-ı âti’z-zikre vekîl olup mûmâ-ileyhânın zât[ını] ma‘rifet-i şer‘iyye ile ârifân olan Abdülkādir Çelebi b. Mehmed ve Mehmed Çelebi b. Mustafa şehâdetleri ile şer‘an vekâletleri sâbite olan Mehmed Sâlih b. Ahmed mahfil-i kazâda işbu sâhibetü’l-kitâb müşârün-ileyhâ Ayşe Hâtun kıbelinden tasdîke vekîl olup bimâ hüve nehci’s-sübût şer‘an vekâleti sâbite olan Hâcce Fâtıma bt. Mustafa nâm hâtun mahzarında bi’l-vekâle ikrâr edip müvekkilem mûmâ-ileyhânın mûrisi müteveffâ-yı mezbûrun muhallefâtı, halîlesi müvekkilem mezbûre ile kerîmesi müvekkile-i müşârün-ileyhâ beynlerinde tevzî‘ ve bi’l-irsi’ş-şer‘î taksîm olundukda, müteveffâ-yı mezbûrun emlâkinden olup medîne-i Hazret-i Ebâ Eyyûb el-Ensârî’de Baba Haydar-ı Nakşibendî mahallesinde vâki‘ etrâf-ı erba‘ası tarîk-i âm ile mahdûd dâhiliyye ve hâriciyye fevkānî ve tahtânî büyût-ı müte‘addideyi ve sofaları ve iki kıt‘a zât-ı eşcâr-ı müsmire ve gayr-ı müsmire bahçeleri ve bahçe içinde yedi bâb odaları ve cem‘an beş aded su kuyusunu müştemil olan menzil cemî‘-i tevâbi‘ ve levâhıkı ile ve âmme-i menâfi‘ ve merâfıkı ile kerîme-i mükerremesi müvekkile-i müşârün-ileyhânın hissesine isâbet ve intikāl edip kat‘â benim alâkam kalmamışdır ve müşârün-ileyhâ Ayşe Hâtun’un mülk-i mevrûsudur, keyfe mâ yeşâ’ mutasarrıfe olsun deyicek gıbbe’t-tasdîk ve’t-taleb mâ cerâ kayd şüd. Fi’l-yevmi’r-râbi‘ ve’l-ışrîn min Zilka‘deti’ş-şerîfe li sene isneteyn ve mi’eteyn ve elf. Şuhûdü’l-hâl: Abdülkādir Çelebi b. İbrahim, Es-Seyyid Ahmed Efendi b. es-Seyyid Nesimi, Osman Bey b. Abdurrahman, Ahmed Çelebi b. Mustafa, Ahmed Çelebi b. Mehmed, Ramazan b. Ahmed, Mehmed Beşe b. Musli, Hüseyin Muhzır, Hüseyin b. Hüseyin ve gayruhüm.