Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 343 Hüküm no: 355 Orijinal metin no: [78b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden İsmail Efendi’nin Ebû Eyyûb el-Ensârî Vakfı’na olan kira borcun ödenmesi davasından borç miktarının tespiti Hazret-i Ebâ Eyyûb el-Ensârî -dâme fî rıdvâni’l-Bârî-leri evkāfı’nda berât-ı pâdişâhî ile müşâhere câbîsi olan râfi‘ü’l-kitâb Ali Çelebi b. Hızır nâm kimesne meclis-i şer‘de Himmet Beşe b. Mehmed nâm kimesne mahzarında üzerine takrîr-i da‘vâ edip bundan akdem vefât eden İsmail Efendi evkāf-ı mezbûreden yevmî bir akçe icâre ile mutasarrıf olduğu mahzenin bin altmış bir senesi şehri Recebü’l-müreccebi’ne gelince yüz otuz iki ayda zimmetinde müctemi‘ üç bin dokuz yüz altmış akçe ve yine yevmî bir akçe icâreli âhar mahzenin târih-i mezbûra gelince on iki ayda müctemi‘ üç yüz altmış akçe ve yine yevmî bir akçe icâreli pazarcı dükkânının târih-i mezbûra gelince on altı ayda müctemi‘ dört yüz seksen akçe ki cem‘an dokuz bin dört yüz seksen akçe icâresini hâl-i hayâtında üçümüz meclis-i vâhidde hâzır iken mezbûr Himmet Beşe’den bana havâle-i sahîha-i şer‘iyye ile havâle etmeğin her birimiz havâle-i mezkûreyi kabûl ve meblağ-ı mezbûrun iki bin akçesini mezbûr Himmet Beşe yedinden kabz ve bin altı yüz akçesi Çırçır nâm kimesne yedinden ve iki yüz akçesi kasabdan bana vâsıl olup bâkī beş bin altı yüz akçeyi vakf için mezbûr Himmet Beşe’den taleb eylediğimde teslîmden imtinâ‘ eder hâlâ suâl olunup alıverilmek matlûbumdur deyicek gıbbe’s-suâl mezbûr Himmet Beşe, cevâbında fi’l-vâki‘ hâl minvâl-i muharrer üzre olmuşdur, lâkin câbî-i mezbûr-ı merkūm Çırçır’dan üç bin akçe vâsıl olmuşdur. Ol hesâb üzre ancak dört bin iki yüz seksen akçe kalır deyicek isre’l-istintâk ve akībe’l-inkâr mezbûr Himmet Beşe’den ziyâdeyi mübeyyine beyyine taleb olundukda, ityân-ı beyyineden izhâr-ı acz ile istihlâf etmeğin merkūm câbî Ali Çelebi’ye zikr olunan meblağdan merkūm Çırçır’dan bin altı yüz akçeden ziyâde olmadığına ve âhar yediyle vâsıl olmadığına ve meblağ-ı bâkīden dahi küllen ve ba‘zan müteveffâ-yı mezbûrdan ve yâhud vekîlinden ahz ve istîfâ ve yâhud havâle eylemediğine yemîn teklîf olundukda, ol dahi alâ vefki’l-mes’ûl yemîn billâhi te‘âlâ etmeğin mûcebiyle zikr olunan beş bin altı yüz seksen akçeyi vakf için câ’i’z-zikri mezbûra edâ ve teslîme merkūm Himmet Beşe’ye tenbîh birle mâ hüve’l-vâki‘ kayd şüd. Fi’l-yevmi’s-sâmin ve’l-ışrîn min Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Mehmed Çelebi b. Ahmed, Mustafa Çelebi b. Rüstem, Mustafa Çelebi b. Hüdâverdi, Ahmed Ağa b. İslâm, Mehmed Çelebi b. Musli, Hasan muhzır ve gayruhüm mine’l-hâzırîn.