Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 342 Hüküm no: 354 Orijinal metin no: [78b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Beşe b. Memi ile kızı Emetullah’ın kendilerini yaralayan Mehmed b. Abdullah ile sulh oldukları Fi’l-asl Havâss-ı Refî‘a kazâsına tâbi‘ Terkos nâhiyesi a‘mâlinden Çiftalan nâm karyeden olup hâlâ medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Çavuş Kasım mahallesinde sâkin olup mecrûh ve sâhib-firâş olmağla meclis-i şer‘a huzûru müte‘azzir olan Ali Beşe b. Memi tarafından sulh ve ibrâ-i âti’z-zikre ve bedel-i sulhü kabza vekîl olup es-Seyyid Bostânî Çelebi b. es-Seyyid Ahmed ve Mehmed Çelebi b. Ömer şehâdetleriyle şer‘an vekâleti sâbite olan üvey oğlu diğer Ali Beşe nâm râcil ile mecrûh-ı mezbûrun sulbiye-i kebîre kızı olup vech-i âtî üzre sol elinin serçe parmağı maktû‘a ve yanında olan parmağı dahi mecrûha ve amel-mânde olan Emetullah bt. Ali nâm hâtun meclis-i şer‘de müvekkil-i merkūm ile kızı mezbûreyi vech-i câ’î üzre mecrûh etmekle hâlâ zâbiti yedinde mahbûs olan sâhibü’l-kitâb Mehmed b. Abdullah tarafından ikrâr-ı âti’z-zikri tasdîke vekîl olup bimâ hüve nehci’s-sübût şer‘an vekâleti sâbite olan Süleyman b. Mehmed mahzarında her biri bi’l-asâle ve bi’l-vekâle ikrâr ve takrîr-i kelâm edip bundan akdem müvekkil-i mezbûr mârrü’z-zikr karyede bi gayri hakkın müvekkil-i mezbûru harbe ile omuzu başına darb ve mecrûh ve benim dahi sol elimin serçe parmağını harbe ile darb ve kat‘ ve yanında olan parmağını dahi mecrûh ve amel-mânde etmeğin biz dahi husûs-ı mezbûru müvekkil-i merkūmdan da‘vâ ol dahi ikrâr etmekle hâkim-i muvakki‘-i sadr-ı kitâb müvekkil-i mezbûrun cerhi için hükûmet-i adl ve her bir parmak için öşr-i diyet hükm etmişiken beynimizde muslihûn tavassut edip da‘vâ-yı mezkûrumuzdan müvekkil-i mezbûr ile bizi an ikrâr on bin nakd-i râyic-i fi’l-vakt akçe üzerine inşâ-i akd-i sulh eylediklerinde biz dahi bi’l-asâle ve bi’l-vekâle sulh-i mezbûru kabûl ve bedel-i sulh olan mezbûrü’n-na‘t mârrü’z-zikr on bin akçeyi asâleti ve vekâleti hasebiyle müvekkil-i mezbûr tamamen alıp kabz edip husûs-ı mezbûre müte‘allik âmme-i de‘âvî ve mütâlebât ve eymân ve muhâsamâtdan müvekkil-i mezbûrun zimmetini ibrâ ve iskāt eyledik dediklerinde mukırrân-ı mezbûrânı ikrâr-ı meşrûhlarında vekîl-i mezbûr vekâleten bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Hasan b. Mehmed, Himmet b. Maksud, Mehmed Ağa zâbit-i karye-i mezbûre, Mustafa Beşe b. Ömer, Tayyib b. Muharrem, Süleyman b. Mehmed ve gayruhüm mine’l-hâzırîn.