Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 350 Hüküm no: 363 Orijinal metin no: [80a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Halife b. Sefer’in evini İbrahim b. Hacı Yusuf’a bey‘ bi’l-istiğlâl yoluyla satması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Şeyh Ahmed mahallesi sâkinlerinden olup Otakçıbaşı mahallesi imâmı olan Mehmed Halîfe b. Sefer meclis-i şer‘-i hatîr-i lâzımü’t-tevkīrde medîne-i mezbûrede Evlice Baba mahallesinde sâkin iken bundan akdem vefât eden el-Hâc Yusuf’un sulbî sagīr oğlu İbrahim’in tesviye-i umûru için kıbel-i şer‘den mansûb vasî[si] olan sâhibü’l-kitâb Mustafa Çelebi b. Hüdâverdi mahzarında ikrâr ve takrîr-i kelâm edip emlâkimden mahalle-i mezbûrede vâki‘ bir tarafdan Mehmed b. Mahmud mülkü ve bir tarafdan Yakub Ağa vakfı ve bir tarafdan Ferhunde Hâtun mülkü ve bir tarafdan tarîk-i âm ile mahdûd mülk menzilimi bi cümleti’t-tevâbi‘ ve’l-levâhık sagīr-i mezbûr malıyla yüz kıt‘a esedî guruşa alâ tarîki’l-istiğlâl bey‘ edip ol dahi vesâyeti hasebiyle tarîk-i mezbûr üzre iştirâ edip semeni olan mezbûrü’n-na‘t yüz kıt‘a esedî guruşu sagīr-i mezbûr malından olmak üzre vasiyy-i merkūm yedinden tamamen alıp kabz eylediğinden sonra yine menzil-i mahdûd-ı mezkûru ba‘de’t-tahliyye ve’t-tekābuz târih-i kitâbdan sene tamâmına değin on beş kıt‘a esedî guruş icâre ile bana îcâr ve teslîm, ben dahi vech-i muharrer üzre istîcâr ve tesellüm ve kabz ve kabûl eyledim deyicek ,gıbbe’t-tasdîki’l-mu‘teber Okçu Ahmed Çelebi b. Mehmed ve hemşîresi ve zevci Ali Çelebi b. Süleyman meclis-i mezbûrda derk-i menzil-i mahdûd-ı mezkûra emr ve kabûlü hâvî kefâlet-i sahîh-i şer‘iyye ile kefîl olmağın men lehü’t-tasdîk kıbelinden ba‘de’l-kabûl mâ cerâ bi’t-taleb kayd şüd. Fi’l-yevmi’r-râbi‘ ve’l-ışrîn min Zilhicceti’ş-şerîfe li sene isneteyn ve seb‘în ve elf. Şuhûdü’l-hâl: Mehmed Çelebi b. Ahmed, Ahmed Çelebi b. Mehmed, Mahmud Çelebi b. Ahmed, Eyüb Çelebi b. Mehmed, Mehmed Çelebi b. Musli, Kasımpaşalı Mustafa Çelebi ve gayruhüm mine’l-hâzırîn.