Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 351 Hüküm no: 364 Orijinal metin no: [80b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Ali’nin aldığı borç karşılığı İbrahim’in vasîsine bazı eşyasını rehin vermesi Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Şeyh Ahmed mahallesinde sâkine Hatice bt. Ali nâm hâtun tarafından ikrâr-ı âti’z-zikre vekîl olup mezbûrenin zâtını ma‘rifet-i şer‘iyye ile ârifân olan Ahmed Çelebi b. Mehmed ve Ali Çelebi b. Süleyman şehâdetleriyle şer‘an vekâleti sâbite olan zevci Mehmed Çelebi b. Sefer Hâce meclis-i şer‘de yine medîne-i mezbûrede Evlice Baba mahallesinde sâkin iken bundan akdem vefât eden el-Hâc Yusuf’un sulbî sagīr oğlu İbrahim’in tesviye-i umûru için kıbel-i şer‘den mansûb vasî olan hâmilü’l-kitâb Mustafa Çelebi b. Hüdâverdi mahzarında bi’l-vekâle ikrâr ve takrîr-i kelâm edip zevcem müvekkile-i mezbûre sagīr-i mezbûr malından onu on bir buçuk hesâbı üzre vasiyy-i mezbûr Mustafa Çelebi yedinden yüz on kıt‘a esedî guruş istirbâh ve kabz ve tesellüm, ol dahi bi’l-vesâye irbâh ve teslîm ve yine vasiyy-i mezbûr yedinden müşterâ ve makbûz levn ve cinsi ve zirâ‘ı ve kıymeti beynlerinde târih-i kitâbdan üç yüz altmış gün tamâmına değin müeccel ve mev‘ûd çuka bahâsından dahi on altı buçuk kıt‘a esedî guruş ki cem‘an yüz yirmi altı buçuk esedî guruş mukābelesinde zevcem müvekkile-i mezbûre emlâkinden işbu meclis-i şer‘de mevcûd ortaları zümrüd ve üçer pâyeli bir çift küpe ve bir la‘l yüzük ve on iki miskāl bir altın andişe bilezik ve dört dal inci çapraz ve beyaz zincir tîğ-bendli bir sîm çengel kuşak ve başlarıyla cem‘an yüz yirmi sekiz paftalı bir mükemmel raht kuşak ve biri kırmızı ve bir mor telli kaftanlar ve bir beyaz kılabdanla işleme harîr yeşil şâl-ı Keşmîrîsini vasiyy-i mezbûr yedine rehn-i makbûz vaz‘ ve teslîm, ol dahi vech-i muharrer üzre irtihân ve tesellüm ve kabz ve kabûl eyledi zevcem mezbûr İnşâ’allâhü te‘âlâ zikr olunan yüz yirmi altı buçuk kıt‘a esedî guruşu üç yüz altmış gün tamâmında vasiyy-i mezbûra edâ ve teslîm eylediğimde zikr olunan rihânımı bana def‘ ü teslîm eyle dedi dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min Zilhicceti’ş-şerîfe li sene isneteyn ve seb‘în ve elf. Şuhûdü’l-hâl: Mehmed Çelebi b. Ahmed, Ahmed Çelebi b. Mehmed, Mahmud Çelebi b. Ahmed el-Câbî, Eyüb Çelebi b. Mehmed, Mehmed Çelebi b. Musli, Ali Beşe b. Emrullah, Receb Bey kethüdâ ve gayruhüm mine’l-hâzırîn.