Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 367 Hüküm no: 384 Orijinal metin no: [83b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiremitçi Ahmed Çelebi Vakfı’nın mütevellisinin hak sahipleri Abdi Çelebi b. Derviş ile Kerime Hatun’a borcunu ödemesi gerektiği Havâss-ı Aliyye kazâsına tâbi‘ kasaba-i Hasköy’de vâki‘ merhûm Kiremitçi Ahmed Çelebi evkāfı’na bi’l-fi‘l mütevellî olan Mehmed Çavuş b. Ebûbekir meclis-i şer‘-i hatîr-i lâzımü’t-tevkīrde merhûm-ı mezbûrun evlâdının evlâdı Abdi Çelebi b. Derviş nâm asîl ve hemşîresi Kerime Hâtun tarafından tasdîke vekîl olup zâtını ma‘rifet-i şer‘iyye ile ârifân olan Mehmed Efendi b. Mustafa ve Ramazan Bey b. Abdullah şehâdetleriyle şer‘an vekâleti sâbite olan dâmâdı Mehmed Çelebi b. Hasan nâm vekîl mahzarlarında ikrâr ve takrîr-i kelâm edip merhûm-ı mezbûr vakfının mesârif-i mu‘ayyenesinden fazlasını li’z-zekeri mislü hazzi’l-ünseyeyn evlâdına ve evlâd-ı evlâdına şart ve ta‘yîn ve vakfiye-i ma‘mûlün-bihâsında tahrîr ve tensîs etmeğin ba‘de’l-harc ve’l-mesârıf gallât-ı vakf-ı mezbûrdan on yedi bin yüz otuz iki akçe mezbûr Abdi Çelebi hissesinden on üç bin beş yüz altmış altı akçe müvekkile-i mezbûre Kerime Hâtun hissesinden zimmetinde bâkī kalıp cem‘an otuz bin altı yüz doksan sekiz akçe merkūm Abdi Çelebi ve müvekkile-i mezbûre Kerime Hâtun zimmetinde lâzımü’l-edâ deynimdir deyû bi tav‘ihî ikrâr etmeğin alâ mûcebi ikrârihî zikr olunan otuz bin altı yüz doksan sekiz akçeyi merkūmân Abdi Çelebi [84a] ve Kerime Hâtun’a edâ ve teslîm ile mütevellî-i mezbûr Mehmed Çavuş ilzâm olunup mâ hüve’l-vâki‘ kayd şüd. Fî gurreti Muharremi’l-harâm sene 1073. Şuhûdü’l-hâl: Mehmed Efendi el-İmâm, Mustafa Efendi b. Sinan, Abdülbâkī Çelebi el-Müezzin, Mehmed Ağa b. Kalender, Şaban Bey [b.] Bahri, Ali Çelebi b. Mehmed ve gayruhüm mine’l-hâzırîn.