Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 366 Hüküm no: 383 Orijinal metin no: [83b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Sinan’ın mülk hisselerini amcası Ömer Bey b. Ali’ye satması Vilâyet-i Rumeli’nde Avlonya sancağına tâbi‘ İskarpar kazâsına tâbi‘ İspiror nâm karyede sâkin Ahmed b. Sinan nâm şâbb-ı emred mahfil-i kazâda ammisi olan râfi‘ü’l-kitâb Ömer Bey b. Ali nâm kimesne mahzarında ikrâr ve takrîr-i kelâm edip ammi-i mezbûr ile müşâ‘-ı müşterek olup mülk-i mevrûsemiz olan emlâkden karye-i mezbûrede vâki‘ etrâf-ı erba‘ası ammim mezbûr tasarrufunda olan arsa ve tarîk-i âm ile mahdûd bir bâb fevkānî ve bir bâb tahtânî odaları ve anbar ve bir ahırı müştemil mülk-i mevrûs menzilde olan üç hissede bir hisseyi ve yine karye-i mezbûre sınırı dâhilinde vâki‘ hudûdu beynimizde ma‘lûm üç kıt‘a bağda olan üç hisse[den] bir hisse-i şer‘iyye-i şâyi‘ayı, cümle-i tevâbi‘ ve levâhıkı ile ammim mezbûre Ömer Bey’e bi safkatin vâhidetin bin nakd-i râyic fi’l-vâki‘ akçeye tarafeynden îcâb ve kabûlü hâvî bey‘-i bâtt-ı kat‘î ile bey‘ eylediğimde ol dahi minvâl-i muharrer üzre iştirâ ve kabûl eyledikden sonra yine karye-i mezbûre sınırı dâhilinde vâki‘ lede’l-ahâlî ve’l-cîrân ma‘lûmü’l-kıta‘ ve’l-mikdâr tarlalarda olan üç hissede bir hisse-i şâyi‘amı ve etrâfında mevcûd olan zeytin ve asma eşcârlarının dahi üç sehimde bir sehim hisse-i şâyi‘amı dahi ammim mezbûr Ömer Bey’e iki bin akçe bedel mukābelesinde sâhib-i arz ma‘rifetiyle ferâğ ve tefvîz edip ol dahi minvâl-i muharrer üzre tefevvüz ve kabûl eyleyip semen-i mezbûr bin akçe ile bedel-i mersûm iki bin akçe ki cem‘an üç bin akçeyi ammim mezbûr Ömer Bey yedinden tamamen alıp kabz eylediğimden sonra sâlifü’z-zikr menzil-i mahdûd-ı mezkûr ile bağ-ı mezkûrun ve ol tarlaların üç sehimden bir sehmi mahallinde ahz ü kabz [ve] zabt u tasarrufa tarafımdan ammim mezbûr ve Ömer Bey’e taslît eyledim min ba‘d benim alâka ve medhalim yokdur. Min ba‘d mezbûrun mülküne dâhil olup emsâli tasarrufu gibi keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî gurreti şehri Muharremi’l-harâm li sene selâse ve seb‘în ve elf. Şuhûdü’l-hâl: Hasan b. Derviş, Dost b. Hüseyin, Mehmed b. İsmail, Hasan b. Ali, Mehmed b. Mustafa, Osman Beşe b. Ali.