Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 368 Hüküm no: 386 Orijinal metin no: [84a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Teodora bt. Şiro’nun bazı emlâkini Yorgo v. Andon’a satması Fi’l-asl Vilâyet-i Rumeli’nde Kûhistan nâhiyesine tâbi‘ Ayatriada nâm karyede sâkine Teodora bt. Şiro nâm nasrâniye tarafından bey‘-i câ’i’z-zikri edâya ve kabz-ı semene vekîl olup mezbûreyi ma‘rifet-i şer‘iyye ile ârifân olan Dimo v. Franko ve Yorgi v. Dimo şehâdetleriyle şer‘an vekâleti sâbite olan Keretsi v. Yorgi nâm zimmî vekîl mahfil-i kazâda karye-i mezbûrede sâkin işbu râfi‘ü’s-sifr Yorgo v. Andon nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin müvekkilem mezbûrenin silk-i mülk-i sahîhinde münselik olan emlâkimden karye-i mezbûrede vâki‘ bir tarafdan Nikola mülkü ve bir tarafdan Dimo mülkü ve bir tarafdan bostan ve taraf-ı erba‘ası tarîk-i âm ile mahdûd dört bâb fevkānî oda ve altında mahzeni de mevcûd iki fıçı ve bir kıt‘a bostan yerini ve iki anbarı ve ( ) dib dut ağacı ve bir dib ceviz ağacı ve bir mikdâr havluyu müştemil mülk menzili, cemî‘ tevâbi‘ ve levâhıkı ile ve yine karye-i mezbûre sınırı dâhilinde vâki‘ bir tarafdan Nikola bağı ve bir tarafdan Dimo bağı ve bir tarafdan diğer Dimo bağı ve taraf-ı âharı tarîk-i âm ile mahdûd üç çapalık bir kıt‘a mülk bağını bi safkatin vâhidetin vekâletim hasebiyle sekiz bin üç yüz fıddî nakd-i râyic fi’l-vakt akçeye merkūm Yorgi’ye tarafeynden îcâb ve kabûlü hâvî bey‘-i bâtt-ı sahîh-i kat‘î ile bi’l-vekâle bey‘ edip ol dahi minvâl-i muharrer muharrer üzre iştirâ ve kabûl eyleyip semeni olan meblağ-ı mezbûr sekiz bin üç yüz akçeyi müvekkile-i mezbûre için bi’l-vekâle merkūm Yorgi yedinden bi’t-tamâm alıp kabz edip menzil-i mahdûd-ı mezkûr ve bağ-ı merkūm mahallinde zabt ve tasarrufa tarafımdan bi’l-vekâle merkūm Yorgi’yi taslît eyledim dedikde gıbbe’t-tasdîki’l-mu‘teber kayd şüd. Fî 4 min Muharremi’l-harâm sene 1073. Şuhûdü’l-hâl: Hüseyin b. Ali, Hüseyin b. ( ) el-Muhzır Hasan, Mehmed b. Ahmed, Mehmed b. Musli ve Mavridi v. Nikola, Yorgi v. Nikola ve Yorgi ve Dimo, Tanaş v. Dimo, Dimo v. İstaki ve Nikola v. Yani, Nikola v. Yoram, Harito v. İstamo, Dimo v. Nikola ve İstati v. Şiro, Yani v. Mavridi [ve] Dimo v. Kokter? ve Şiro v. Dimo ve Franko v. Yani ve Hristo v. Nikola ve gayruhüm.