Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 369 Hüküm no: 387 Orijinal metin no: [84a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. Tanaş’ın bağını Komino v. Nikola’ya satması Fi’l-asl Vilâyet-i Rumeli’nde Yenişehir kazâsına tâbi‘ Kûhistan nâhiyesinde vâki‘ Ayatriada nâm karyede sâkin Dimo v. Tanaş nâm zimmî mahfil-i kazâda işbu râfi‘ü’s-sifri’ş-şer‘î Komino v. Nikola nâm zimmî muvâcehesinde bi’t-tav‘i’s-sâf ikrâr ve takrîr-i kelâm edip akd-i âti’z-zikrin sudûruna değin zabt ve taht-ı tasarrufumda olan emlâkimden olup karye-i mezbûre hudûdu dâhilinde vâki‘ bir tarafdan Dimo v. Keretsi bağı ve bir tarafdan kendi mülk bağım ve bir tarafdan Yorgi nâm zimmî bağı ve taraf-ı âharı tarîk-i âm ile mahdûd dört çapalık bir kıt‘a mülk bağı cümle-i tevâbi‘ ve levâhıkı ile merkūm Komino’ya bin sekiz yüz râyic fi’l-vakt akçeye tarafeynden îcâb ve kabûlü hâvî bey‘-i bâtt-ı kat‘î ile bey‘ edip ol dahi minvâl-i muharrer üzre iştirâ ve kabûl eyleyip semeni olan meblağ-ı mezbûru mezbûr Komino yedinden tamamen alıp kabz eylediğimden sonra sâlifü’z-zikr bir kıt‘a bağı mahallinde zabt u tasarrufa tarafımdan merkūm Komino’yu taslît eyledim benim alâka ve medhalim yokdur, merkūm Komino’nun mülk-i müşterâsı olmuşdur, keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ kayd şüd. Fi’l-yevmi’r-râbi‘ min Muharremi’l-harâm li sene selâse ve seb‘în ve elf. Şuhûdü’l-hâl: Hüseyin Çelebi b. Ali, Hüseyin b. Hasan Muhzır, Mehmed b. Mahmud el-Muhzır ve Nikola v. Yorgo, Yani v. Mavridi, Dimo v. Keretsi, Yorgi v. Kini, Dimo v. Nikola gayruhüm mine’l-hâzırîn.