Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 374 Hüküm no: 393 Orijinal metin no: [85b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Turabi’nin miras hususunda Rahime bt. Veli’nin zimmetini ibrâ etmesi Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Nişancı Paşa mahallesinde sâkin iken bundan akdem vefât eden Taslak demekle ma‘rûf İbrahim b. Veli nâm müteveffânın verâseti, zevce-i metrûkesi Rahime bt. Veli nâm hâtun ile usûbet-i nesebiyye cihetinden li ebeveyn ammisi oğlu Mehmed Çelebi b. Turâbî nâm kimesneye münhasıra olduğu şer‘an zâhir ve müte‘ayyin oldukdan sonra mezbûr Mehmed Çelebi meclis-i şer‘-i hatîr-i lâzımü’t-tevkīrde merkūme Rahime tarafından her husûsuna vekâlet-i mutlaka ile vekîl-i şer‘-i müsecceli olan bâ‘isü’l-kitâb Abdurrahman Çelebi b. Ahmed nâm vekîl mahzarında ikrâr ve takrîr-i kelâm edip mûrisimiz müteveffâ-yı mezbûrun muhallefâtının rub‘u zevcesi mezbûr Rahime Hâtun’a ve selâse-i erbâ‘ı bana bi’l-irsi’ş-şer‘î isâbet ve intikāl etmekle mezbûre Rahime’nin vekîli mezbûr Abdurrahman Çelebi müteveffâ-yı mezbûrun kalîl ü kesîr ve celîl ü hakīr nukūd ve akār ve menkūlât ve hubûbât ve sâir ism-i mâl ıtlâk olunur mecmû‘-ı muhallefâtından müvekkilesi mezbûre Rahime’ye isâbet ve intikāl eden rub‘ hisse-i şer‘iyyesi da‘vâsından vesâtat-ı muslihûn ile yirmi üç bin fıddî nakd-i râyic fi’l-vakt akçe üzerine benim ile alâ tarîki’t-tehârüci’ş-şer‘î sulh olup bedel-i sulh yedimden tamamen alıp müvekkilesi mezbûre için kabz ve müteveffâ-yı mezbûrun mecmû‘-ı muhallefâtından müvekkilesi mezbûre Rahime’ye isâbet eden rub‘ hissesi da‘vâsından ve istîfâ da‘vâsından gayrı sâir de‘âvî ve mütâlebâtdan benim zimmetimi bi’l-vekâle ibrâ ve iskāt etmişdi el-hâletü hâzihî ben dahi mûrisim müteveffâ-yı mezbûrun muhallefâtına müte‘allik cemî‘ de‘âvî ve mütâlebâtdan müvekkile-i mezbûre Rahime’nin ve vekîli mezbûr Abdurrahman Çelebi’nin zimmetlerini ibrâ ve iskāt eyledim min ba‘d mezbûre ile benim dahi vechen mine’l-vücûh da‘vâ ve nizâ‘ım yokdur deyicek gıbbe’t-tasdîki’l-mu‘teber mâ cerâ kayd şüd. Fi’l-yevmi’s-sâdis min Muharremi’l-harâm sene 1073. Şuhûdü’l-hâl: Mehmed Çelebi b. Musli, Ramazan Çelebi b. Ali, Halil Çelebi b. İbrahim, es-Seyyid Mehmed Çelebi b. es-Seyyid Mustafa, Receb Bey b. Maden ve gayruhüm mine’l-hâzırîn.