Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 373 Hüküm no: 392 Orijinal metin no: [85b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahime bt. Veli’nin kocasının mirası hususunda diğer mirasçı Mehmed Çelebi b. Turabi ile sulh olması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Nişancı Paşa mahallesinde sâkin iken bundan akdem vefât eden Taslak demekle ma‘rûf İbrahim b. Veli nâm müteveffânın verâseti, zevcesi Rahime bt. Veli nâm hâtun ile usûbet-i nesebiyye cihetinden li ebeveyn ammisi oğlu Mehmed Çelebi b. Turâbî nâm kimesneye münhasıra olduğu şer‘an zâhir ve müte‘ayyin oldukdan sonra mezbûre Rahime tarafından her husûsa vekâlet-i mutlaka ile vekîl-i şer‘-i müsecceli olan Abdurrahman Çelebi b. Ahmed nâm vekîl meclis-i şer‘-i hatîr-i lâzımü’t-tevkīrde işbu râfi‘ü’l-kitâb mezbûr Mehmed Çelebi mahzarında bi’l-vekâle ikrâr ve takrîr-i kelâm edip müvekkilem mezbûre Rahime’nin mûrisi zevci müteveffâ-yı mezbûrun muhallefâtının rub‘u bi’l-irsi’ş-şer‘î zevce-i metrûkesi müvekkilem mezbûreye ve selâse-i erbâ‘ı min ciheti’l-usûbeti’n-nesebiyye ibn-i ammi mezbûr Mehmed Çelebi’ye isâbet ve intikāl edip lâkin mezbûr Mehmed Çelebi müteveffâ-yı mezbûrun mecmû‘-ı muhallefâtına vaz‘-ı yed edip müvekkilem mezbûre Rahime’ye isâbet edip rub‘ hissesini tamamen teslîme te‘allül ve ekser muhallefâtı ketm ile cevâb vermekle beynlerinde münâza‘ât-ı kesîre cereyân etmişdi el-hâletü hâzihî beynimize muslihûn tavassut edip müvekkilem mezbûre Rahime Hâtun’a zevci müteveffâ-yı mezbûrun mecmû‘-ı muhallefâtından irsen isâbet eden rub‘ hissesi da‘vâsından mecmû‘-ı muhallefâtına vaz‘-ı yed olan mezbûr Mehmed Çelebi ile beni mevâni‘den ârî sıhhat-i şerâit-i sulhü hâvî tehârüc-i şer‘î vechi üzre yirmi üç fıddî nakd-i râyic fi’l-vakt akçe üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan mezbûrü’n-na‘t yirmi üç bin akçeyi tamamen müvekkilem mezbûre Rahime için mezbûr Mehmed Çelebi yedinden alıp kabz edip müteveffâ-yı mezbûrun nukūd ve akār ve hubûbât ve menkūlât ve sâir kalîl ve kesîr ve celîl ü hakīr irâde-i seniyye-i mülûkâne mal ıtlâk olunur mecmû‘-ı muhallefâtından müvekkilem mezbûreye isâbet eden rub‘ hissesi da‘vâsından ve müteveffâ-yı mezbûrun Nişancı Paşa vakfı arsası üzer[in]e eylediği binânın istîfâ da‘vâsından gayrı mecmû‘-ı de‘âvî ve mütâlebât ve eymân ve muhâsamâtdan mezbûr Mehmed Çelebi’nin zimmetini bi’l-vekâle ibrâ eyledim deyicek gıbbe’t-tasdîki’l-mu‘teber mâ hüve’l-vâki‘ kayd şüd. Fi’l-yevmi’s-sâdis min Muharremi’l-harâm li sene selâse ve seb‘în ve elf. Şuhûdü’l-hâl: Mehmed Çelebi b. Musli, Ramazan Çelebi b. Ali, Halil Çelebi b. İbrahim, es-Seyyid Mehmed Çelebi b. es-Seyyid Mustafa, Receb Bey b. Maden, Mehmed b. Mahmud ve gayruhüm mine’l-hâzırîn.