Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 375 Hüküm no: 395 Orijinal metin no: [86a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hristodolo’nun Hamza Çavuş Vakfı’na istiğlâl yoluyla olan borcunu ölümü dolayısıyla vârislerinin üstlenmesi Mahmiye-i İstanbul’da Sultan Selim kurbunda Cafer Ağa mahallesinde sâkin iken bundan akdem mürd olan Hristodolo v. Dimitri nâm zimmînin verâseti, zevce-i metrûkesi Kendonye bt. Andon nâm nasrâniye ile sulbî kebîr oğulları İskoli ve Yamandi ve Yorgi nâm zimmîlere münhasıra olduğu şer‘an zâhir ve müte‘ayyin oldukdan sonra merkūme Kendonye meclis-i şer‘de merhûm Hamza Çavuş vakfı’na bi’l-fi‘l mütevellî olan hâmilü’l-kitâb fahrü’l-müderrisîn Mehmed Efendi b. Hasan mahzarında bi tav‘ihî ikrâr ve takrîr-i kelâm edip mûrisimiz hâlik-i mezbûr hâl-i hayâtında silk-i mülk-i sahîhimde münselik olan emlâkden mahalle-i mezbûrede vâki‘ bir tarafdan tülbentçi Tanaş mülkü ve bir tarafdan Vasil nâm zimmî mülkü ve bir tarafdan vakfı ve bir tarafdan tarîk-i âm ile mahdûd mecmû‘ mülk menzilini mütevellî-i mezbûr yüz yirmi kıt‘a riyâlî guruşa alâ tarîki’l-istiğlâl bey‘ ve teslîm, ol dahi mâl-ı vakf-ı mezbûr ile tarîk-i mezbûr üzre iştirâ ve tesellüm edip semeni olan yüz yirmi kıt‘a riyâlî guruşu mâl-ı vakf-ı mezbûrdan olmak üzre mütevellî-i mezbûr yedinden tamamen alıp kabz eyledikden sonra mütevellî-i mezbûr menzil-i mahdûd-ı mezkûru ba‘de’t-tahliyye ve’t-tekābuz müddet-i ma‘lûme tamâmına değin icâre-i ma‘lûme ile hâlik-i mezbûra îcâr ve teslîm, ol dahi vech-i muharrer üzre istîcâr ve tesellüm ve kabz ve kabûl etmişdi el-hâletü hâzihî mûrisimiz hâlik-i mezbûr mürd olmağla icâre-i mezkûre fesh olmağın zikr olunan yüz yirmi kıt‘a riyâlî guruş mâl-ı vakfı ben kendi rızâ ve ihtiyârım ile üzerime alıp târih-i kitâbdan üç sene tamâmına değin her senede bin beş yüz akçe olmak üzre mütevellî-i mezbûr üzerime ilzâm-ı ribh-i şer‘î eylemişdir zikr olunan yüz yirmi kıt‘a riyâlî guruş ki bi hesâb-ı hurda on bin akçe asıl ve üç senenin murâbaha-i şer‘iyyesi ki onu on bir buçuk hesâbı üzre dört bin beş yüz akçe vakf-ı mezbûra zimmetimde lâzımü’l-edâ ve vâcibü’l-kazâ deynimdir deyû bi tav‘ihâ ikrâr ve i‘tirâf etmeğin oğulları merkūmân İskoli ve Yorgi zimmî meclis-i mezbûrda zikr olunan yüz yirmi kıt‘a riyâlî guruş asl-ı mâl-ı vakf-ı mezbûr ve üç senenin murâbaha-i şer‘iyyesi dört bin beş yüz akçeyi mütevellî-i mezbûra edâ ve teslîme her birimiz emr ve kabûlü hâvî kefâleti sahîha-i şer‘iyye ile kefîl olduk dediklerinde mütevellî-i mezbûr dahi mukırra-i mezbûreyi kelimât-ı meşrûhasında vicâhen tasdîk ve mezbûrânın kefâletini ba‘de’l-makbûl, mâ hüve’l-vâki‘ kayd şüd. Fi’l-yevmi’l-hâmis min Muharremi’l-harâm sene 1073. Şuhûdü’l-hâl: Sâlih Mehmed Efendi b. Mehmed, Mehmed Çelebi b. Mahmud, Hasan b. Abdullah, Hamza Efendi b. Hasan, Hüseyin muhzır ve gayruhüm mine’l-hâzırîn.