Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 376 Hüküm no: 396 Orijinal metin no: [86a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Bey b. Abdullah’ın evini Ali Ağa Vakfı’na bey‘ bi’l-istiğlâl yoluyla satması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de vâki‘ Nazperver mahallesi sükkânından Mustafa Bey b. Abdullah nâm kimesne meclis-i şer‘-i hatîr-i lâzımü’t-tevkīrde merhûm Ali Ağa evkāfı’nın nukūduna bi’l-fi‘l mütevellî olan işbu bâ‘isü’l-kitâb Davud Efendi b. Mehmed mahzarında bi tav‘ihî ikrâr ve takrîr-i kelâm edip emlâkimden olup mahalle-i mezbûrede vâki‘ bir tarafdan el-Hâc Mustafa mülkü ve bir tarafdan Abdülkerim nâm kimesne mülkü ve bir tarafdan mahallesi mezbûre mescidi imâmına meşrûta olan vakıf menzil ve taraf-ı râbi‘i saraylı Maksud Hâtun mülkü ve ba‘zan tarîk-i hâs ile mahdûd olan mülk menzilimi bi cümleti’t-tevâbi‘ ve’l-levâhık mütevellî-i mezbûra alâ tarîki’l-istiğlâl bey‘ ve teslîm edip ol dahi vakf-ı mezbûr malı ile yetmiş beş kıt‘a riyâlî guruşa iştirâ ve tesellüm ve kabz ve kabûl eyleyip semeni olan mezbûrü’n-na‘t yetmiş beş kıt‘a riyâlî kebîr guruşu mütevellî-i mezbûr Davud Efendi yedinden tamamen alıp kabz eylediğimden sonra yine mütevellî-i vakf-ı mezbûr Davud Efendi menzil-i mahdûd-ı mezkûru ba‘de’t-tahliyyeti’ş-şer‘iyye târih-i kitâb Muharremü’l-harâmı gurresinden üç sene tamâmına değin beher senesi altışar yüz altmış akçeden üç senede cem‘an bin dokuz yüz seksen akçe ücret ile bana îcâr ve teslîm, ben dahi minvâl-i muharrer üzre istîcâr ve tesellüm ve kabz ve kabûl eyledim deyû ikrâr ve i‘tirâf etmeğin mâ cerâ kayd şüd. Fi’l-yevmi’s-sâlis min Muharremi’l-harâm li sene selâse ve seb‘în ve elf. Şuhûdü’l-hâl: Ali Çelebi kâtib-i vakf, Ahmed Çelebi b. Ali, Mehmed Çelebi b. Veli, Mustafa Çelebi b. İsmail, Abdullah Çelebi b. Mustafa, Mehmed b. Mustafa ve gayruhüm mine’l-hâzırîn.