Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 382 Hüküm no: 401 Orijinal metin no: [87a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kerime bt. Mehmed’in annesinin mirası hususunda babasının zimmetini ibrâ etmesi Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de vâki‘ Çavuş Kasım mahallesi sâkinelerinden Kerime bt. Mehmed nâm hâtun meclis-i şer‘-i hatîr-i lâzımü’t-tevkīrde babası râfi‘ü’l-kitâb mezbûr Mehmed Efendi b. eş-Şeyh Ali mahzarında bi tav‘ihâ ikrâr ve takrîr-i kelâm edip vâlidem olup bundan akdem fevt olan Rahime bt. Ömer nâm hâtun târih-i kitâbdan otuz sene mukaddem silk-i mülk-i sahîhinde münselik olan emlâkinden mahalle-i mezbûrede vâki‘ bir tarafdan yine benim mülk-i mevrûsum olan menzil ve bir tarafdan Çerçici kızı Fâtıma mülkü ve bir tarafdan Hatice nâm hâtun mülkü ve taraf-ı râbi‘i tarîk-i âm ile mahdûd bir bâb tahtânî odayı ve küçük ahırı ve müşterek su kuyusunu ve zât-ı eşcâr-ı müsmire ve gayr-ı müsmire bir mikdâr bahçeyi ve kenîfi müştemil mülk menzilinden ifrâz ve alâmet-i fâsıla vaz‘ eyleyip babam mezbûr Mehmed Efendi’ye kırk sekiz altın kıymetli altından masnû‘ elmas taşlı bir hâtem mukābelesinde hibe ve temlîk ve teslîm edip babam mezbûr Mehmed Efendi dahi meclis-i mezbûrda vech-i mübeyyen üzre târih-i mersûmda ittihâb ve temellük ve tesellüm ve kabz ve kabûl etmişdi el-hâletü [87b] hâzihî sâlifü’z-zikr bir bâb tahtânî odada benim vechen mine’l-vücûh alâka ve medhalim yokdur. Babam mezbûr Mehmed Efendi’nin mülk-i mevhûbudur. Keyfe mâ yeşâ’ ve yahtâr mutasarrıf olsun dedikde mukırra-i mezbûrenin vech-i meşrûh üzre cârî ve sâdır olan ikrârını mezbûr Mehmed Efendi bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb kayd şüd. Fi’l-yevmi’s-sâmin min Muharremi’l-harâm li sene selâse ve seb‘în ve elf. Şuhûdü’l-hâl: Nasuh Odabaşı b. Ali Subaşı seroda 23. Ağa Bölük, Ahmed Odabaşı 138. Ağa bölüğü, Sâlih Çelebi b. Mehmed, Eyüb Çelebi b. Mehmed, Ali Çelebi b. Cafer, Hüseyin Efendi el-İmâm ve gayruhüm mine’l-hâzırîn.