Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 383 Hüküm no: 403 Orijinal metin no: [87b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâlih Mehmed Efendi’nin kölesi Kenan’ı bir sene hizmet şartıyla âzat etmesi Husûs-ı âti’l-beyânı mahallinde tahrîr için bi’t-taleb irsâl olunan mevlânâ Sâlih Mehmed Efendi, ol dahi zeyl-i kitâbda muharrerü’l-esâmî olan müslimîn ile medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Koca Kasım mahallesinde sâkin fahrü’l-a‘yân Gönderci Ali Çelebi b. Mehmed’in sâkin olduğu hersine varıp akd-i meclis eylediğinde mûmâ-ileyh Ali Çelebi meclis-i ma‘kūd-ı mezkûrda kendiye rıkkını mu‘terif uzun boylu açık kaşlı gök elâ gözlü göğsünde sağ tarafında alâmet-i cerhi ve yüzünde çiçek yarası olan sarışın Rûsiyyü’l-asl sarı bıyıklı hâmilü’l-vesîka Kenan b. Abdullah nâm abd-i memlûkü mahzarında ikrâr ve i‘tirâf edip abd-i memlûküm mevsûf-ı mezkûru târih-i kitâb şehri gurresinden sene tamâmına değin min gayrı hıyânet hizmet etmek üzre kitâbete kesdim, vaktâ kim bir sene bana hizmet ede abd-i memlûküm mevsûf-ı mezkûr hasbeten lillâhi te‘âlâ malımdan âzâd olup sâir ahrâr-ı asliyyîn gibi hür olup üzerinde hakk-ı velâdan gayrı hakkım kalmaz deyicek mevlâsı mezkûr Ali Çelebi’ye târih-i kitâb şehri gurresinden bir sene-i kâmile hizmet ettikden sonra gulâm-ı mevsûf-ı mezkûrun ıtkına ba‘de’l-hükm vâki‘ü’l-hâli mevlânâ-yı mezbûr mahallinde ketb ü tahrîr ve ba‘dehû meclis-i şer‘de alâ vukū‘ihî inhâ ve takrîr etmeğin mâ cerâ kayd şüd. Fi’l-yevmi’l-âşir mine’l-Muharremi’l-harâm sene 1073. Şuhûdü’l-hâl: Umdetü’s-sâlikîn Mehmed Dede b. Kalender, Mustafa Çelebi b. Mahmud, Halil Çelebi b. ( ) el-Muhzır?, Gelibolulu Mehmed Çelebi er-Râcil, Abdülkādir Çelebi b. Mehmed.