Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 384 Hüküm no: 404 Orijinal metin no: [87b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çeşmisiyah bt. Abdullah’ın kocası Mehmed Çelebi b. Ebûbekir’den boşanması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Takyecibaşı mahallesi sâkinelerinden Çeşmisiyah bt. Abdullah nâm hâtun tarafından hul‘-ı âti’z-zikri ve ibrâ-i câ’i’l-beyânı ikrâra vekîl olup mezbûrenin zâtını ma‘rifet-i şer‘iyye ile ârifân olan el-Hâc İsâ mahallesi müezzini Ali Dede b. Ahmed ve Piyâle Bey b. Abdullah el-Cündî şehâdetleriyle şer‘an vekâleti sâbite olan İbrahim Bey b. Nasuh nâm vekîl meclis-i şer‘de müvekkile-i mezbûrenin zevci Mehmed Çelebi b. Ebûbekir tarafından kezâlik muhâla‘a-i âtiyyetü’z-zikri ve ibrâ-i câ’i’l-beyânı ikrâra vekîl olup Ahmed Çelebi b. Ali ve Mehmed Beşe b. İbrahim şehâdetleriyle şer‘an vekâleti sâbite olan Ebûbekir Beşe b. Ali nâm vekîl mahzarında bi’l-vekâle ikrâr ve takrîr-i kelâm edip müvekkile-i mezbûre Çeşmisiyah Hâtun’un zevci mezbûr Mehmed Çelebi ile beynlerinde şikāk vâki‘ olmağın zimmetinde mütekarrir olan iki bin akçe mehr-i müeccelinden ve nafaka-i iddet-i mu‘ayyene ve me’ûnet-i süknâsından fâriğa olmak üzre zevci müvekkil-i mezbûr Mehmed Çelebi ile muhâla‘a eyleyip zimmetini zevciyyete müte‘allik âmme-i de‘âvî ve mütâlebât ve eymân ve muhâsamâtdan ibrâ ve iskāt eyledim min ba‘d zevcim mezbûr ile da‘vâ ve nizâ‘ım yokdur dedi deyicek vekîl-i mezbûrân Bekir Beşe dahi meclis-i mezbûrda müvekkilim mezbûr Mehmed Çelebi dahi zevcesi müvekkile-i mezbûre ile minvâl-i muharrer üzre olan hul‘-ı mezbûru kabûl edip zimmetini ibrâ eyledim dedi deyicek vekîl-i mezbûrun bi’l-vekâle cârî olan ikrârını vekîl-i âhar bi’l-vekâle vicâhen ve şifâhen tasdîk ve tahkīk etmeğin mâ hüve’l-vâki‘ kayd şüd. Fi’l-yevmi’l-âşir min Muharremi’l-harâm sene 1073. Şuhûdü’l-hâl: Receb Efendi b. Yusuf, Ahmed Çelebi b. Ali, Mehmed Çelebi b. İbrahim, Mehmed Çelebi b. Musli, Hüseyin b. Hasan ve gayruhüm mine’l-hâzırîn.