Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 130 Hüküm no: 150 Orijinal metin no: [35b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Miftahağasızade Mehmed Ağa’nın uhdesindeki mukataayı Manav Süleyman’a iltizam etmeyip önceden olduğu gibi Hüseyin Ağa’ya iltizam etmesi <> Ma‘rûz-ı dâ‘î-i Devlet-i aliyyeleridir ki Cânib-i şerî‘at-i garrâdan mürsel müderrisîn-i kirâmdan Mîrî Kâtibi Feyzullah Efendi dâ‘îleri saray-ı defterîde Başbâkīkulu ağalara mahsûs odaya varup akd-i meclis-i şer‘-i şerîf etdikde Kumluca-i sagīr mukāta‘ası mülhakātından Kartal ve Gekbûze kazâlarına tâbi‘ Soğanlık ve Yakacık ve Yayalar ve Aydınlı ve Orhanlı karyeleri ahâlîlerinden ashâb-ı arzuhâl Mehmed Ağa ve el-Hâc Mehmed Ağa ve Mustafa Beşe ve Salih Beşe ve İbrahim Çelebi ve es-Seyyid Mehmed ve es-Seyyid Süleyman Beşe ve Hüseyin Usta ve İmam Salih Efendi nâm kimesneler meclis-i ma‘kūd-ı mezkûrda mukāta‘a-i mezkûrenin südüs hissesine bâ-berat-ı âlîşân mutasarrıf olan Miftâhağasızâde el-Hâc Mehmed Ağa mahzarında hâlâ rikâb-ı kâm-yâb Başbakıkulu izzetlü İbrahim Ağa hâzır olduğu hâlde mukāta‘a-i mezbûrenin mecmû‘u on sekiz seneden beri kazâmız sükkânından işbu hâzır bi’l-meclis Hüseyin Ağa iltizâm edüp müddet-i mezbûrede teftîş ve resmiyetde bir kimesneye ta‘addî ve cevr eylemediğinden biz ve sâir ahâlî kendüden râzı ve hoşnûd olup mukāta‘a-i mezbûrenin mutasarrıfları dahi hisselerini ke’l-evvel seksen iki senesinde mezbûr Hüseyin Ağa’ya iltizâm etmiş iken mezbûr el-Hâc Mehmed Ağa sene-i mezbûreyi manav tâifesinden el-Hâc Süleyman nâm kimesneye iltizâm etmekle mezbûr el-Hâc Süleyman müddet-i vâfireden beri karyelerimize sülûku sebebiyle evzâ‘ u etvârı ma‘lûmumuz ve bizleri ızrâr kasdında olacağı yakīnen meczûmumuz olup ve henüz kendüsü hisse-i merkūmeye vaz‘-ı yedi dahi olmamağla azledüp hisse-i mezbûresini ke’l-evvel merkūm Hüseyin Ağa’ya iltizâm etmesi matlûbumuzdur dediklerinde merkūm el-Hâc Mehmed Ağa dahi hakīkat ilzâma tevkîl olmağla mezbûr Manav el-Hâc Süleyman azl ve mukāta‘a-i mezbûreden ber-minvâl-i muharrer südüs hissesini seksen iki senesi Martı ibtidâsından bir sene tamâmına değin mezbûr Hüseyin Ağa’ya beş yüz elli guruş bedel-i makbûza ilzâm ol dahi ber-minvâl-i muharrer iltizâm etmekle mültezim-i mezbûr Hüseyin Ağa mukāta‘a-i mezbûreyi zabt ve ta‘şîr etmek içün emr-i âlî istid‘â ve istirhâm eylediğini mevlânâ-yı mûmâ-ileyh mahâllinden tahrîr ve meclis-i şer‘a gelüp alâ-vukū‘ıhî inhâ eylediği ma‘lûm-ı devletleri buyruldukda ol bâbda emr ü fermân re’y-i rezîn-i âsafânelerine menûtdur. Fî 8 min-Muharremü’l-haram sene 1183