Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 130 Hüküm no: 149 Orijinal metin no: [35b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa’nın Kartal’daki yeniçerilerin başına serdar tayin olunduğu ve Kartal kadısının ve yeniçeri serdarının görevlerini yerine getirmeleri hususunda gayretli olmaları Şerî‘at-şi‘âr Kartal kādısı efendi -zîde fazluhum- ba‘de’s-selâm inhâ olunur ki zîr-i hükûmetinizde vâki‘ Dergâh-ı âlî yeniçerileri serdârı ref‘ olunup yerine üslûb-ı sâbık üzere kıdvetü’l-emâsil ve’l-akrân altıncı bölüğün Hasan Ağa -zîde kadruhû- serdâr ve zâbit nasb ü ta‘yîn olunmağın işbu mektûb tahrîr ve irsâl olundu inşâallâhü te‘âlâ vusûlünde gerekdir ki mûmâ-ileyhi serdârlığı umûrunda kıyâm eyleyüp âharı müdâhale etdirmeyesin ol havâlîde vâki‘ Dergâh-ı âlî yeniçerileri ve cebeci ve topçu ve top arabacısı ve kul oğulları ve gılmân-ı acemî cümlesi seni üzerlerine serdâr ve zâbit bilüp sözünden taşra ve re’yinden hâric vaz‘ u hareketde bulunmayup itâ‘at ve inkıyâd üzere olalar ve tavâif-i merkūmûndan bilâ-vâris-i ma‘rûf fevt olanlarının muhallefâtı [ve] metrûkâtları serdâr-ı merkūma kabz etdirdüp ma‘rifet-i şer‘le Sûk-ı Sultânî’de fürûht ve hâsıl olan nukūdunu mümzâ ve mahtûm müfredât defterleriyle cânib-i beytülmala irsâl ve îsâl etdirdesiz ve sen ki serdâr-ı mûmâ-ileyhsin mukīm ve misâfirden zuhûr eden erâzil ve eşkıyânın zabt u rabtlarına ve sükkân-ı vilâyetin emn ü rahatlarına bâ‘is hıdemât-ı müstahsene-i mebrûre vücûda getirmeye mücidd ü sâ‘î olup mûcib-i mektûb ile âmil olasın. Tahrîren fî-gurreti şehri Muharremü’l-haram li-sene selâse ve semânîn ve mi’ete ve elf. ...?