Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 386 Hüküm no: 407 Orijinal metin no: [88a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Raziye Hatun bt. Yusuf’un evini eski Defter emini Mustafa Efendi’ye satması Husûs-ı âti’l-beyânı mahallinde tahrîr için bi’t-taleb irsâl olunan mevlânâ Sâlih Mehmed Efendi b. Mehmed zeyl-i kitâbda muharrerü’l-esâmî olan müslimîn ile medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Bıçakçı mahallesinde mütemekkin olup sâbıkan defter emîni olan iftihârü’l-emâcid ve’l-ekârim Mustafa Efendi b. Abdüddâim nâm kimesnenin bahçesine varıp akd-i meclis-i şer‘ eylediğinde yine mahalle-i mezbûre sâkinelerinden Râziye Hâtun bt. Yusuf meclis-i ma‘kūd-ı mezkûrda, işbu kitâb-ı sıhhat-nisâbın sâhibi müşârün-ileyh Mustafa Efendi mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olan emlâkimden mahalle-i mezbûrede vâki‘ iki tarafdan Pîr Mehmed Çelebi mülkü ve bir tarafdan mûmâ-ileyh Mustafa Efendi mülkü ve bir tarafdan Ali Çelebi b. Hasan mülkü ve ba‘zan Mustafa Çelebi mülkü ve ba‘zan Ahmed Çelebi mülkü ve tarîk-i hâs ile mahdûd iki bâb fevkānî oda ve bir kiler ve tahta-pûş ve bir tahtânî ve bir ahır ve zât-ı eşcâr-ı müsmire ve gayr-ı müsmire bahçe ve üç bi’r-i mâ ve kenîfi müştemil mülk menzilimi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık müşârün-ileyh Mustafa Efendi’ye yirmi üç bin fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bey‘ ve teslîm, ol dahi vech-i muharrer üzre iştirâ ve tesellüm ve kabz ve kabûl edip semeni olan mezbûrü’n-na‘t yirmi üç bin akçeyi tamamen müşterî-i müşârün-ileyh yedinden alıp kabz edip menzil-i mahdûd-ı mezkûrda alâkam kalmadı ba‘de’l-yevm menzil-i mezkûr mûmâ-ileyh Mustafa Efendi’nin mülk-i mahz-ı müşterâsı ve hakk-ı sarîhidir, keyfe mâ yeşâ’ mutasarrıf olsun dedikde gıbbe’t-tasdîki’l-mu‘teber vâki‘ü’l-hâli mevlânâ-yı mezbûr mahallinde tahrîr, ba‘dehû meclis-i şer‘a gelip alâ vukū‘ihî inhâ ve takrîr etmeğin mâ cerâ kayd şüd. Fi’l-yevmi’s-sâlis aşer min Muharremi’l-harâm li sene selâse ve seb‘în ve elf. Şuhûdü’l-hâl: Ahmed Efendi