Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 385 Hüküm no: 406 Orijinal metin no: [88a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Havva bt. Abdullah’ın câriyesi Timurhan’ın âzat etmesi Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Fethi Çelebi mahallesi sâkinelerinden Havva bt. Abdullah nâm hâtun tarafından ıtk-ı câ’i’z-zikri ve hibe-i âtiyyetü’l-beyânı ikrâra vekîl olup mezbûrenin zâtını ma‘rifet-i şer‘iyye ile ârifân olan Ahmed Çelebi b. Receb el-Müezzin ve Hüseyin Beşe b. Veli şehâdetleriyle şer‘an vekâleti sâbite olan İbrahim Efendi b. Mustafa nâm vekîl meclis-i şer‘de bi’l-vekâle ikrâr ve takrîr-i kelâm edip müvekkilem mezbûre kendisine rıkk-ı sâbıkını mu‘terife işbu uzun boylu açık kaşlı siyah elâ gözlü Moskoviyyetü’l-asl Timurhan bt. Abdullah nâm câriye-i memlûkesini, hasbeten lillâhi te‘âlâ ve haseneten li rûhi resûlihi’l-mu‘allâ cemî‘ malından ifrâz ve i‘tâk ve tahrîr ve zümre-i harâir-i asliyyâta ilhâk ve idrâc edip min ba‘d üzerinde hakk-ı velâdan gayrı hakkım kalmadı dedi dedikden sonra yine vekîl-i mezbûr meclis-i mersûmda bi’l-vekâle ikrâr edip müvekkilem mezbûre mu‘takası merhûme Timurhan’a silk-i mülk-i sahîhinde münselik emlâkinden iki yemeni yorgan ve bir beledî minder ve bir beledî yastık ve bir tencere ve bir sahan ve bir kilimimi mezbûra hibe-i sahîha-i şer‘iyye ile hibe ve temlîk ve teslîm edip ol dahi meclis-i hibede ittihâb ve temellük ve tesellüm ve kabz ve kabûl eyledi dedi deyû bi’l-vekâle ikrâr etmeğin mâ hüve’l-vâki‘ kayd şüd. Fi’l-yevmi’l-hâdî aşer min şehri Muharremi’l-harâm li sene selâse ve seb‘în ve elf. Şuhûdü’l-hâl: Durmuş Beşe b. Ramazan, sirkeci Mustafa Beşe, Mehmed Dede b. Ali, el-Hâc Mehmed b. Mahmud, Solak Mustafa ve gayruhüm mine’l-hâzırîn.