Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 399 Hüküm no: 422 Orijinal metin no: [91a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yoğurtçu Yuvan v. Mitre’nin kardeşinin davasında çoban Ali’yi mesul tutmadığı Yoğurtçu tâifesinden Yuvan v. Mitre nâm zimmî meclis-i şer‘-i hatîr-i lâzımü’t-tevkīrde çoban tâifesinden işbu râfi‘ü’l-kitâb Ali b. Abdullah mahzarında bi’t-tav‘ ve’r-rızâ lâ-bi’l-kerh ve’l-cezâ ikrâr ve takrîr-i kelâm edip Havâss-ı Aliyye kazâsı ihtivâsından Topçular nâm karye kurbunda vâki‘ Çiço Çiftliği demekle ma‘rûf mahal mukābelesinde koyun geçesi içinde târih-i kitâbdan bir gece mukaddem li ebeveyn karındaşım Balaban v. Mitre mecrûhan maktûl bulunmağla kātili sensin ve yâhud kātili bilirsin deyû mezbûr Ali’den mukaddemâ da‘vâ eylediğimde ol dahi inkâr etmişdi el-hâletü hâzihî da‘vâ-yı mezkûrumdan fâriğ olup husûs-ı mezbûra müte‘allik âmme-i de‘âvî ve mütâlebât ve eymân ve muhâsamâtdan merkūm çoban Ali’nin zimmetini ibrâ-i âmm-ı kātı‘ü’n-nizâ‘la ibrâ ve iskāt-ı tâmm-ı râfi‘ü’l-hisâm birle ibrâ ve iskāt eyledim min ba‘d mezbûr çoban Ali ile vechen mine’l-vücûh ve sebeben mine’l-esbâb da‘vâ ve nizâ‘ım yokdur, zuhûr dahi ederse lede’l-hükkâmi’l-kirâm mesmû‘a ve makbûle olmasın deyicek mukırr-ı mezbûrun minvâl-i meşrûh üzre cereyân eden ikrârını merkūm çoban Ali vicâhen ve şifâhen tasdîk ve tahkīk etmeğin mâ cerâ bi’t-taleb kayd şüd. Fi’l-yevmi’r-râbi‘ ve’l-ışrîn min Zilka‘deti’ş-şerîfe li seneti isneteyn ve seb‘în ve elf. Şuhûdü’l-hâl: Mustafa Çelebi b. Süleyman, Bereket b. Abdullah, Süleyman Beşe b. Ahmed, Musa Beşe b. Mehmed, Mahmud Beşe b. Musli ve gayruhüm mine’l-hâzırîn.