Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 398 Hüküm no: 421 Orijinal metin no: [91a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kadı Hızır Efendi’nin bazı emlâkini satıp bazısının kullanım hakkını devretmesi Vilâyet-i Rumeli’nde Avlonya sancağına tâbi‘ Arnavud Belgradı kazâsı a‘mâlinden Bahtalı nâm karye sükkânından fahrü’l-kuzât Hızır Efendi b. Bayram nâm kadı meclis-i şer‘-i hatîr-i lâzımü’t-tevkīrde işbu râfi‘ü’l-vesîka Simo ve Yano veledey Mato nâm karındaşlar muvâcehelerinde bi’t-tav‘ ve’r-rızâ ikrâr ve takrîr-i kelâm edip bey‘-i câ’i’z-zikrin sudûruna değin silk-i mülk-i sahîhimde münselik olan emlâkimden olup karye-i mezbûrede vâki‘ bir tarafdan Yuvan nâm zimmî mülkü ve bir tarafdan Reste v. Moce mülkü ve bir tarafdan Papa Nano nâm râhib mülkü ve taraf-ı râbi‘i tarîk-i âm ile mahdûd ve bir bâb fevkānî ve bir bâb tahtânî odaları ve bir anbarı ve menzil-i mezbûrda mevcûd üç aded fıçı ve şırahâneyi ve zât-ı eşcâr-ı müsmire ve gayr-ı müsmire bahçeyi müştemil çiftlik ta‘bîr olunur mülk menzilimi cümle tevâbi‘ ve levâhıkı ile yine karye-i mezbûre hudûdu dâhilinde vâki‘ bir tarafdan Reste v. Moce bağı ve bir tarafdan Yuvan v. Tebre bağı ve iki tarafdan Hristo [v.] Moce bağı ile mahdûd tahmînen sekiz çapalık mülk bağı ve yine hudûd-ı mezbûrda vâki‘ etrâf-ı erba‘ası Kosta v. Todori ve Reste [v.] Moce ve Kola v. Saraviçe bağları ile mahdûd tahmînen on çapalık bir kıt‘a mülk bağımı dahi merkūmân Simo ve Yano’ya tarafeynden îcâb ve kabûlü hâvî bey‘-i bâtt-ı sahîh-i şer‘î ile bi safkatin vâhidetin ale’l-iştirâki’s-seviy bâtten bey‘ eylediğimde anlar dahi ber vech-i iştirâk minvâl-i muharrer üzre iştirâ ve kabûl eylediklerinden sonra yine karye-i mezbûre sınırı dâhilinde tefvîz-i âti’z-zikrin sudûruna değin zabt ve taht-ı tasarrufumda olup inde’l-ahâliyi’d-diyâr ma‘lûmetü’l-kıta‘ ve’l-mikdâr beynimizde ma‘lûm tarlalarımın ve etrâfında vâki‘ olan on iki dib zeytin eşcârı ile otuz dib ceviz eşcârı ve yirmi dib armud eşcârlarımın dahi hakk-ı tasarrufların, sâhib-i arz ma‘rifetiyle merkūmân Simo ve Yano’ya ale’l-iştirâk iki bin akçe bedel mukābelesinde ferâğ ve tefvîz edip anlar dahi ale’ş-şirketi’s-seviyye vech-i meşrûh üzre tefevvüz ve kabûl eylediklerinden sonra semen-i mezbûr üç bin akçe ile bedel-i mersûm iki bin akçe ki cem‘an beş bin akçeyi merkūmân yedlerinden tamamen ahz ü kabz edip çiftlik-i mahdûd-ı mezkûru ve on sekiz çapalık bağları ile sâlifü’z-zikr tarlaları mahallinde ale’l-iştirâk ahz ü kabz zabt u tasarrufa merkūmân Simo ve Yano’yu taslît eyledim min ba‘d benim alâkam yokdur emsâli gibi mutasarrıf olsunlar deyicek gıbbe’t-tasdîki’ş-şer‘iyyi’l-vicâhiyyi’l-mu‘teber mâ cerâ kayd şüd. Fî gurreti Zilhicceti’ş-şerîfe li seneti isneteyn ve seb‘în ve elf. Şuhûdü’l-hâl: Kaldırımcı kethüdâsı Bayram b. Mehmed, Ali Beşe b. Sinan, Aydın Beşe b. Haydar, Ali Beşe b. Mahmud, Osman Beşe b. Abdullah, Abdülaziz b. Ahmed ve gayruhüm mine’l-hâzırîn.