Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 415 Hüküm no: 440 Orijinal metin no: [94b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Huri bt. İbrahim’in Şeref b. Ataullah’ta olan alacağının tahsil edilmesi İşbu bâ‘isetü’l-kitâb Huri bt. İbrahim nâm hâtun mahfil-i kazâda Şeref b. Atâullah mahzarında üzerine takrîr-i da‘vâ edip mezbûr Şeref benim ile hemşehir olmağla târih-i kitâbdan iki ay mukaddem bi tarîki’l-vedî‘a yedi kıt‘a esedî ve beş kıt‘a riyâlî guruş merkūm Şeref yedine def‘ ve teslîm, ol dahi tarîk-i mezbûr üzre kabz ve tesellüm etmişiken meblağ-ı mezbûrun altı kıt‘a esedî guruşunu bana def‘ ve teslîm, ben dahi kabz ve tesellüm edip bâkī bir esedî ve beş kıt‘a riyâlî guruşumu dahi merkūm Şeref’den taleb eylediğimde huzûr-ı müslimînde ikrâr dahi etmişiken hâlâ teslîmden imtinâ‘ eder suâl olunup alıverilmek matlûbumdur deyicek gıbbe’s-suâl ve akībe’l-inkâr müdde‘iye-i mezbûreden müdde‘âsını mübeyyine beyyine taleb olundukda, udûl-i ricâlden medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Kiremitçi Süleyman mahallesinde sâkin Ahmed Çelebi b. Mehmed ve Şaban Beşe b. Mahmud el-Hallâk nâm kimesneler li ecli’ş-şehâde makām-ı kazâya hâzırân olup istişhâd olunduklarında, fi’l-hakīka işbu târih-i kitâb günü müdde‘iye-i mezbûre merkūm Şeref’e adam sana emânet olmak üzre def‘ ve teslîm eylediğim akçemi niçin vermezsin dediğinde ol dahi bizim huzûrumuzda müdde‘iye-i mezbûre Huri’ye senden on iki guruş aldım altı guruşunu sana def‘ ve teslîm eyledim bâkī zimmetimde altı guruş hakkın kalmışdır anı dahi şey’en fe-şey’en sana edâ ve teslîm ederim deyû ikrâr eylemişdir biz bu husûsa şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle meblağ-ı bâkī altı guruşu müdde‘iye-i mezbûre Huri’ye edâ ve teslîme merkūm Şeref’e tenbîh-i şer‘î birle mâ hüve’l-vâki‘ kayd şüd. Fi’l-yevmi’l-hâmis min Zilhicceti’ş-şerîfe li sene isneteyn ve seb‘în ve elf. Şuhûdü’l-hâl: İbrahim b. Nasrullah, Musa Dede b. Şaban el-Halvetî, Hamza Efendi b. Hasan, Ali Beşe Çukadâr, Receb Kethüdâ ve gayruhüm mine’l-hâzırîn.