Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 416 Hüküm no: 441 Orijinal metin no: [95a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Ahmed Çelebi’nin muallimhâne para vakfına mütevelli tayini Havâss-ı Aliyye kazâsı a‘mâlinden kasaba-i Hasköy’de Kiremitçi Ahmed Çelebi mahallesi sâkinlerinden muhtârü’l-ulemâ Receb Efendi b. Ali ve Abdülbâkī Çelebi b. Ahmed el-Müezzin ve Hasan Ağa b. Hızır ve Ahmed b. Abdullah ve Mehmed Ağa b. Ahmed nâm kimesneler ve sâir cemm-i gafîr meclis-i şer‘a hâzırûn olup her biri takrîr-i kelâm ve ifâde-i merâm edip sâlifü’z-zikr Kiremitçi el-Hâc Ahmed kasaba-i mezbûrede hasbeten lillâhi te‘âlâ binâ eylediği mu‘allimhânesinin mu‘allimliği câmi‘-i şerîfi imâmına şart edip lâkin vazîfesi şey’-i kalîl ve ta‘lîm-i sıbyâna imdâd için mu‘ayyen halîfesi olmamağla mu‘allimhâne-i mezkûr nice zamân hâlî ve mu‘attal kalmağın târih-i kitâbdan bir sene mukaddem evkāf-ı mezbûre müstagallâtından olup Süleyman Paşa’ya cânib-i vakıfdan iki yüz elli bin akçe icâre-i mu‘accele ile îcâr olunan Kiremithâne hissesinin vakıf için kabz olunan mârrü’z-zikr iki yüz elli bin akçenin mesârif-i mu‘ayyeneden fazlası vâkıf-ı mezbûrun evlâdı beyninde şart-ı vâkıf üzre tevzî‘ olunmak üzre iken, evlâd-ı vâkıf-ı mezbûr kendi rızâlarıyla meblağ-ı mezbûrdan yirmi iki bin akçe ifrâz ve vakf edip meblağ-ı mezbûr istirbâh olunup hâsıl olan murâbahası mu‘allimhâne-i mezkûrenin halîfesine vazîfe olmak üzre ta‘yîn eylediklerinde sicil ve hüccet olunmuşken, merhûm-ı mezbûrun evkāfına mütevellî olan Mehmed Çavuş meblağ-ı mezbûru kendi zimem olmak üzre kabz ve üzerine ilzâm-ı ribh-i şer‘î olunmuşken, hâlâ sene hulûl etmeğin meblağ-ı mezbûrun murâbahasını mu‘allimhâne-i mezkûra halîfe[sine] edâda ta‘allül etmeğin meblağ-ı mezbûra müstakillen bir mütedeyyin kimesne mütevellî olmayıcak mezbûr Mehmed Çavuş yedinde bi’l-külliyye zâyi‘ ve telef olmak mukarrer ve muhakkakdır el-hâletü hâzihî mahalle-i mezbûre ahâlîsinden hâzır bi’l-meclis Ali Çelebi b. Mehmed mârrü’z-zikr yirmi iki bin akçe üzerine hasbî mütevellî nasb ve ta‘yîn olunmak matlûbumuzdur dediklerinde hâkim-i muvakki‘-i sadr-ı kitâb hazretleri dahi hâmilü’l-kitâb mezbûr Ali Çelebi’yi zikr olunan yirmi iki bin akçe üzerine hasbî mütevellî nasb ve mukaddemâ ta‘yîn olunduğu üzre istirbâh ve istiğlâl edip her sene mezkûr halîfesine vazîfesini edâ etmek üzre tenbîh buyurup ol dahi tevliyyet-i mezbûreyi kabûl ve hıdemât-ı lâzımesini edâda müte‘ahhid olmağın mâ cerâ bi’t-taleb kayd şüd. Fi’l-yevmi’l-hâmis min Zilhicceti’ş-şerîfe li sene isneteyn ve seb‘în ve elf. Şuhûdü’l-hâl: Mustafa Çelebi b. Hüdâverdi, Mehmed b. Mahmud, Ali Beşe b. Emrullah, Mehmed Beşe b. Musli, Dilâver b. Abdullah, Hüseyin Muhzır ve gayruhüm mine’l-hâzırîn.