Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 58 Hüküm no: 32 Orijinal metin no: [8a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Margos v. Arzuman’ın Avanos v. Papuk’a sattığı içkiden doğan alacağının tahsili talebi Sâbıkan meyhâneci olan işbu bâ‘isü’s-sifr Margos v. Arzuman nâm Ermeni mahfil-i kazâda çömlekçi tâifesinden Avanos v. Papuk nâm Ermeni muvâcehesinde üzerine takrîr-i da‘vâ edip târih-i kitâbdan sekiz ay mukaddem mesfûr Avanos yedimden sekiz bin yüz akçe istikrâz ve kabz eylediğinden mâ‘adâ yedimden müşterâ ve makbûz kadr u kıymeti beynimizde ilm-i şer‘î birle ma‘lûm hamr bahâsından dahi üç bin dört yüz akçe dahi cem‘an on bir bin beş yüz akçeyi merkūm Avanos’tan taleb eylediğimde teslîmden ta‘allül eder hâlâ suâl olunup alıverilmek matlûbumdur deyicek gıbbe’s-suâl merkūm Avanos cevâbında fi’l-hakīka târih-i mezbûrda müdde‘î-i mersûm yedinden sekiz bin yüz akçe istikrâz ve kabz edip ondan mâ‘adâ müdde‘î-i mezbûr yedinden müşterâ ve makbûz hamr bahâsından dahi üç bin dört yüz akçe ki cem‘an on bir bin beş yüz akçe ile’l-ân müdde‘î-i mezbûr zimmetinde lâzımü’l-edâ ve vâcibü’l-kazâ deynimdir deyû bi tav‘ihî ikrâr etmeğin alâ mûceb-i i‘tirâf zikr olunan on bir bin beş yüz akçeyi müdde‘î-i mezbûr Margos’a edâ ve teslîme mesfûr Avanos ilzâm olunup kayd şud. Fî 21 min [Şa‘bân] sene 1081. Şuhûdü’l-hâl: Eyüb Efendi [b.] Hüseyin Serbölük, Ali b. Abdullah Dilaver el-muhzır, Mehmed b. Mahmud.