Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 61 Hüküm no: 34 Orijinal metin no: [8b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Muhallefâtı Eyüp Sultan vakıflarına hâsıl kaydedilen Amasyalı birine ait malların vereseye iadesi Fi’l-asl vilâyet-i Anadolu’da livâ-yı Amasya a‘mâlinden Varay kazâsına tâbi‘ Karaşar nâm karyeden olup kendi tarafından asîl ve Server ve Fâtıma Hâtunlar tarafından husûs-ı âti’l-beyâna vekîl olup vekâleti mezbûretânın zâtlarını ma‘rifet-i şer‘iyye ile ârifân olan Mehmed Bey b. Abdüsselâm ve Abdülkerim Bey b. Salih nâm cündîler şehâdetleri ile şer‘an sâbite olan Ahmed Bey b. Receb nâm cündî mahfil-i kazâda medîne-i Hazret-i Ebâ Eyyûb el-Ensârî’de vâki‘ beytülmâl-i âmme ve hâssa-i hazret-i müşârun-ileyh evkāfına hâsıl kayd olunmağla muhallefât-ı câi’z-zikre vâzı‘ü’l-yedi olan hazret-i mûmâ-ileyh evkāfı mütevellîsi -kıdvetü’l-emâcid- Ali tarafından husûs-ı âti’z-zikre vekîl ve berât-ı âlîşân ile evkāf-ı mezbûre beytülmâli Emîni Ahmed Çelebi b. Mehmed mahzarında bi’l-asâle ve bi’l-vekâle ikrâr ve takrîr-i kelâm edip bundan akdem ulûfesini almak için gelip medîne-i mezbûrede nalbant dükkânında bi emrillâh vefât eden li ebeveyn karındaşım Mustafa Bey b. Receb’in zâhirde vâris-i ma‘rûfu olmamağla mecmû‘-ı muhallefâtına evkāf-ı mezbûre mütevellîsi müvekkil-i mezbûr Ali Ağa vaz‘-ı yed etmekle verâsetimi ve zevcesi Server ve kızı Fâtıma taraflarından dahi vekâleti vekîl-i emîn-i mezbûr muvâcehesinde ale’l-vechi’ş-şer‘î isbât edip ba‘de’l-hükm müvekkil-i mûmâ-ileyhin ber mûceb-i defter-i kassâm muhallefât-ı müteveffâ-yı mezbûrdan kabz ile üç bin sekiz yüz seksen akçeyi bi’l-asâle ve bi’l-vekâle zabt [edip] müvekkil-i mûmâ-ileyh ve ümm-i veledi zimmetlerinde karındaşım müteveffâ-yı mezbûr muhallefâtından ber mûceb-i defter-i kassâm makbûzları olan meblağ-ı mezbûrdan bir akçe ve bir habbe kalmadı deyicek gıbbe’t-tasdîk kayd şud. Fî 25 min Şa‘bân sene 1081. Şuhûdü’l-hâl: Mustafa Çelebi b. Pervâne, Hüseyin Ağa b. Mehmed, Ali Çelebi b. Hızır, Ahmed Beşe b. Sefer, Yusuf Çelebi b. Abdullah.