Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 61 Hüküm no: 35 Orijinal metin no: [8b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sahibi zuhur eden bir muhallefâtın vekile iadesi Fi’l-asl vilâyet-i Anadolu’da livâ-i Amasya tevâbi‘inden Varay kazâsına tâbi‘ Karaşar nâm karyeden olup hâlâ mahmiye-i İstanbul’da müsâfiren mütemekkin olan sâhibü’l-kitâb Ahmed Bey b. Receb b. İshak nâm cündî medîne-i Hazret-i Ebâ Eyyûb el-Ensârî’de vâki‘ beytülmâl-i âmme ve hâssa-i hazret-i müşârun-ileyh -nevverallâhu merkadehû- evkāfına hâsıl kaydolunmağla muhallefât-ı âti’z-zikre vâzı‘ü’l-yedi olup bi’l-fi‘l evkāf-ı mezbûre mütevellîsi olan -kıdvetü’l-emâcid ve’l-e‘âlî- Ali Ağa tarafından husûs-ı âti’z-zikre vekîl olup berât-ı âlîşân ile evkāf-ı mezbûre beytülmâli emîni olan Ahmed Çelebi [b. Mehmed] mahzarında üzerine takrîr-i da‘vâ edip bundan akdem ulûfesini almak için mahmiye-i mezbûreye gelip medîne-i mezbûrede nalbant dükkânında bi emrillâh fevt olan Mustafa Bey b. Receb nâm kimesnenin li ebeveyn karındaşı ve vârisi zevcesi Server nâm hâtun ile sulbiye kebîre kızı Fâtıma’ya ve bana münhasıra iken mütevellî-i mûmâ-ileyh vârisi olmamak zu‘muyla muhallefât-ı müteveffâ-yı mezbûra vaz‘-ı yed edip ben asâleten ve mezbûretân taraflarından muhallefât-ı mez[bûrede olan] hisse-i şer‘iyyelerini taleb ve da‘vâ zımnında kabz ve kendülere îsâle vekîl olduğum ecilden ve vekâleten taleb eylediğimde teslîminden imtinâ‘ eder suâl olunsun deyicek gıbbe’s-suâl vekîl-i (…) mezbûr Ahmed Çelebi müvekkil-i mûmâ-ileyh muhallefât mikdâr-ı mezbûru ahz u kabzını bi’l-vekâle ikrâr ve müdde‘î-i mezkûr mezbûretânın verâsetlerini inkâr edicek müdde‘î-i mezbûrdan müdde‘âsını mübeyyine beyyine taleb olundukda kazâ-yı mezbûr tevâbi‘inden Öğer nâm karyeden Mehmed Bey b. Abdüsselâm ile el-Hâc İlyas nâm kimesne Abdülkerim nâm cündîler li ecli’ş-şehâde makām-ı kazâya hâzırân olup istişhâd olunduklarında fi’l-vâki‘ vekîl-i mezbûr Ahmed Bey ile müteveffâ-yı mezbûr Mustafa Bey li eb ve üm karındaşlardır babaları Receb, anaları Ayşe ve dedeleri İshak’tır maskat-ı re’sleri karye-i mezbûredir müteveffâ-yı mezbûrun zevcesi Server ile kızı Fâtıma ve karındaşı mezbûr Ahmed’e münhasıra vâris-i âhar (…) mezbûretân ile mezbûr Ahmed Bey mûrisleri müteveffânın muhallefâtından hisselerini ahz u kabz ve îsâle huzûrumuzda vekîl olduğu[nu] kabûl eyledi biz bu husûsa şâhidleriz, şehâdet dahi ederiz deyû her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye makbûle olmağın mûcebiyle ba‘de’l-hükm kayd şud. Fî 25 min Şa‘bân sene 1081. Şuhûdü’l-hâl: Es-Sâbikūn.