Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 68 Hüküm no: 44 Orijinal metin no: [10b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sahak v. Toros’un kefil Ramazan Çelebi’den talep ettiği alacağın reddi Penbeci tâifesinden Sahak v. Toros nâm Ermeni mahfil-i kazâda işbu bâ‘isü’l-kitâb Ramazan Çelebi b. Ali mahzarında üzerine takrîr-i da‘vâ edip gāib ani’l-meclis Aslan nâm Yahudi zimmetinde cihet-i deyn-i şer‘îden yetmiş kıt‘a esedî guruşumu mesfûr Aslan Yahudi’den taleb eylediğimde mezbûr Ramazan Çelebi sâlifü’z-zikr yetmiş guruşumu bana edâ ve teslîme kefîl ve zâmin olmuşken hâlâ taleb eylediğimde edâde ta‘allül eder suâl olunup kefâleti hasebiyle alıverilmek murâdımdır deyicek gıbbe’s-suâl mezbûr Ramazan Çelebi fi’l-hakīka ben gāib-i merkūm Aslan Yahudi’nin nefsine ve hîn-i mütâlebede ihzârına kefîl olmuşdum deyû ikrâr mala kefâletin inkâr edicek müdde‘î-i mezbûr Sahak’tan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin mezbûr Ramazan Çelebi’ye gāib-i mezbûr zimmetinde müdde‘î-i mezbûra deyni olan yetmiş esedîyi edâda kefîl ve zâmin olmadığına yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin merkūm Sahak meblağ-ı mezbûru mütâlebesinden men‘ mezbûr Ramazan Çelebi’ye mersûm Yahudi’yi buluvermeye tenbîh birle mâ cerâ bi’t-taleb ketb olundu. Fi’l-hâmisi aşer min şehri Recebi’l-ferd sene [10]81. Şuhûdü’l-hâl: Hüseyin Çelebi b. Ali, Hasan b. Abdullah, Ali b. Abdullah, Mehmed b. Eyüb ve gayruhüm.