Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 67 Hüküm no: 43 Orijinal metin no: [10b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Panayot’un vârisleri arasındaki nizaın izâlesi Husûs-ı âti’l-beyânı mahallinde tahrîr için bi’t-taleb mahkeme-i şerîfeden bi’t-taleb Mevlânâ Mustafa Efendi irsâl olunup ol dahi zeyl-i rakīmde muharrerü’l-esâmî müslimîn ile Havâss-ı Aliyye kazâsına tâbi‘ Safra nâm karyede sâkin Hürmüz v. Yani nâm zimmînin menziline varılıp akd-i meclis-i şer‘î olundukda karye-i mezbûre sâkinlerinden iken bundan akdem hâlik olan Yorgi v. Panayot nâm zimmînin verâseti zevce-i metrûkesi Zafiri bt. İlya nâm nasrâniye ile sulbî kebîr oğulları Rali ve Kosta ve Panayot nâm zimmîlere ve sulbiye kebîre kızları Carine ve Trandafilo ve Kirano ve İrine nâm nasrâniyelere münhasıra olduğu şer‘an zâhir ve müte‘ayyin oldukdan sonra mezbûre Trandafilo tarafından sulh-ı âti’l-beyânı ikrâra vekîl olup vekâleti mezbûrenin zâtını ma‘rifet-i şer‘iyye ile ârifân olan Hürmüz v. Yani ve Yorgi v. Şiro nâm zimmîler şehâdetleriyle hasm-ı şer‘î-i câhid mahzarında sâbite olan zevci Andon v. Mavridi nâm zimmî meclis-i mezkûrda metrûkât-ı âti’z-zikre vâzı‘ü’l-yedi idiği ikrârları ile sâbit olan vâlidesi mezbûre Zafiri ile karındaşları mezbûrân Rali ve Kosta ve Panayot muvâcehelerinde bi’l-vekâle ikrâr ve i‘tirâf edip zevcem müvekkile-i mezbûre Trandafilo’nun mûrisi babası hâlik-i mezbûr Yorgi’nin metrûkâtı vâlidesi mezbûre ile karındaşlar mezbûrûn Rali ve Kosta ve Panayot zabt ve vaz‘-ı yed edip zevcem müvekkile-i merkūme hisse-i şer‘iyyesini taleb eylediğinde ekser-i eşyâyı ketm ile cevâb verdiklerinde beynlerinde münâza‘ât-ı kesîre ve muhâsamat-ı şedîde vâki‘ olmuşdu el-hâletü hâzihî beynlerine muslihûn tavassut edip mevâni‘den ârî şerâit-i sıhhat-i sulhu hâvî, tehârüc-i şer‘î üzre zevcem müvekkile-i mezbûre ile vâlidesi mezbûre Zafiri ve karındaşları merkūmun Rali ve Kosta ve Panayot elli kıt‘a esedî guruş üzerine inşâ-i akd-i sulh eylediklerinde ol dahi sulh-ı mezbûru kabûl ve bedel-i sulh olan mezbûrü’n-na‘t elli esedî guruşu yedlerinden bi’t-tamâm alıp kabz edip min ba‘d babamız hâlik-i mezbûrun muhallefâtından bi’l-irsi’ş-şer‘î bana isâbet eden hisse-i şer‘iyyeme müte‘allik cemî‘ da‘vâdan vâlidemiz mezbûre Zafiri ve karındaşlarım mezbûrun Rali ve Kosta ve Panayot’un zimmetlerini iskāt eyledim dedi dedikde gıbbe’t-tasdîk vâki‘ hâli Mevlânâ-yı mezbûr mahallinde tahrîr ba‘dehû meclis-i şer‘a gelip inhâ ve takrîr etmeğin kayd şud. Fî 28 min Şaban sene 1081. Şuhûdü’l-hâl: Es-Sâbikūn.