.:: İstanbul Kadı Sicilleri ::.


Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671)
cilt: 29, sayfa: 85
Hüküm no: 74
Orijinal metin no: [16a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Yani v. Petro’nun Yorgaki v. Yani’ye ev, bağ, ahır ve tarla satışı

Vilâyet-i Rumeli’nde Mizistre kazâsına tâbi‘ Longanide nâm karye zimmîlerinden Yani v. Petro meclis-i şer‘de işbu râfi‘ü’l-vesîka Yorgaki v. Yani muvâcehesinde ikrâr ve takrîr-i kelâm edip silk-i mülk-i sahîhimde münselik emlâkimden karye-i mezbûrede vâki‘ bir tarafı Dimitraki mülkü ve etrâf-ı selâsesi mer‘â ile mahdûd iki bâb tahtânî oda ve fırını ve havlusunda iki dip dut ağacını müştemil mülk menzilimi cemî‘ tevâbi‘ ve levâhıkı ile ve yine karye-i mezbûre sınırı dâhilinde lede’l-ahâlî ve’l-cîrân ma‘lûmü’l-hudûd iki kıt‘a mülk bağımı ve adedi ma‘lûm zeytin ve dut eşcârını ve sâir eşcâr-ı müsmire ve gayr-ı müsmireyi ve karye-i mezbûre hâricinde vâki‘ mülk ahırımı mezbûr Yorgaki’ye yedi guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i muharrer üzre iştirâ ve kabûl eyledikden sonra yine karye-i mezbûre sınırında mevâzi‘-i adîdede vâki‘ inde ahâli’d-diyâr ma‘lûme’l-hudûd ve’l-kıtâ‘ ve’l-mikdâr tarlalarımın dahi hakk-ı tasarruflarını mûcib-i sâhib-i arz ile merkūm Yorgaki’ye üç guruş bedel mukābelesinde tefvîz bi’l-ferâğ eylediğimde ol dahi tefevvuz ve kabûl edip semen-i mezbûr ile bedel-i merkūm cem‘an on guruşa mersûm Yorgaki yedinden alıp kabz edip emlâk-i mezbûra ve arâzi-i merkūmeyi mahallinde zabt ve tasarrufa tarafımdan merkūm Yorgaki’yi taslît eyledim dedikde gıbbe’t-tasdîki’l-mu‘teber mâ cerâ kayd şud. Fî 22 min şehri Ramazâni’l-mübârek sene [10]81.


Şuhûdü’l-hâl: Receb b. Timur, Hasan b. Mehmed, Osman b. Mustafa, Süleyman b. Ali, Osman b. Abdullah, Hüsami b. Ali, Ahmed Çelebi b. Mehmed, Tanaş v. Nikola, Kiryazi v. Polihroni, Yani v. Polihroni, Yani v. Nikite, Yorgaki v. Nikite, Dimitraki v. Yorgi, Dimitri Korda, Todri v. Yani