|
Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 84 Hüküm no: 73 Orijinal metin no: [16a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ali b. Hasan’ın eşi Ayşe bt. Mehmed’e karz-ı hasenden doğan borcuyla mülk menzilinin takası
Vilâyet-i Rumeli’de Avlonya sancağına tâbi‘ nefs-i kasaba-i Ergirikasrı sâkinlerinden Ali b. Hasan meclis-i şer‘de zevcesi işbu sâhibetü’l-kitâb Ayşe bt. Mehmed tarafından husûs-ı âti’z-zikre vekîl olup nehc-i şer‘î üzre sâbite olan Hızır Bey b. Ali mahzarında ikrâr ve takrîr-i kelâm edip emlâkinde kasaba-i mezbûrede vâki‘ iki tarafı kendi tasarrufumda olan tarla ve bir tarafı yine kendi bağ ve bahçem ve bir tarafı tarîk-i âm ile mahdûd bir bâb fevkānî oda ve altında ahır ve kileri müştemil mülk menzilimi cümle tevâbi‘ ve levâhıkıyla ve içinde mevcûd efrişe-i beyt ve evânî-i nühâsiye ve gayr-ı nühâsiyyeyi ve kurbunda vâki‘ bağ ve bahçemi ve yine kasaba-i mezbûre bağları dâhilinde vâki‘ bir tarafı Ali bağı ve bir tarafı Nuh Çelebi bağı ve bir tarafı İskender bağı ve bir tarafı tarîk-i âm ile mahdûd bir kıt‘a mülk bağımı cümle tevâbi‘ ve levâhıkıyla zevcem müvekkile-i mezbûre Ayşe’ye on beş bin fıddî nakd-i râyicü’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi minvâl-i muharrer üzre iştirâ ve kabûl edip semeni olan mezbûrü’n-na‘t on beş bin akçeyi zevcem müvekkile-i mezbûre Ayşe’ye cihet-i karz-ı şer‘îden zimmetimde lâzımü’l-edâ deynim olan on beş bin akçeye takās eylediğimde ol dahi mukāssa ve kabûl edip emlâk-i mezbûreyi mahallinde zabt ve tasarrufa tarafımdan mezbûre Ayşe’yi taslît eyledim min ba‘d emlâk-i mezbûrede alâka ve medhalim kalmadı mezbûre Ayşe’nin mülk-i müşterâsıdır mutasarrıf olsun dedikde gıbbe’t-tasdîk [kayd] şud. Fî 20 min Ramazân sene 1081.
Şuhûdü’l-hâl: Hasan b. Abdullah, Hüseyin Karamânî, Mustafa b. Hüseyin, Hacı b. Bayezid
|