|
Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 86 Hüküm no: 76 Orijinal metin no: [16b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Çatalcalı Anastaş’ın veresesi arasında gayr-i menkul hisse satışı
Havâss-ı Aliyye kazâsı muzâfâtından kasaba-i Çatalca’da Hızır İlyas mahallesinde sâkin iken bundan akdem mürd olan Anastaş nâm zimmînin verâseti sulbî kebîr oğulları Dimitraki ve İstefan ve Yanaki nâm zimmîler mahzarında olduğu şer‘an zâhir ve müte‘ayyin oldukdan sonra mezbûrân Dimitraki ve İstefan meclis-i şer‘-i kavîmden karındaşları işbu râfi‘ü’r-rakīm mezbûr Yanaki muvâcehesinde her biri ikrâr ve takrîr-i kelâm edip mûrisimiz babamız hâlik-i mezbûr emlâkinden mahalle-i mezbûrede vâki‘ bir tarafı Hatol oğlu mülkü ve bir tarafı İstefan zimmî mülkü ve bir tarafı vâdî ve taraf-ı râbi‘i tarîk-i hâs ile mahdûd iki bâb fevkānî oda ve havlu ve zât-ı eşcâr-ı müsmire ve gayr-ı müsmire bahçeyi müştemil menzilden ve yine mahalle-i mezbûrede vâki‘ bir tarafı Boyacı Mihal mülkü ve bir tarafı kenîse ve bir tarafı Savani mülkü ve taraf-ı râbi‘i tarîk-i âm ile mahdûd iki bâb tahtânî mahzenden ve yine kaldırım kurbunda vâki‘ bir tarafı Nikola bağı ve bir tarafı İstati bağı ve tarafeyni tarîk-i âm ile mahdûd bir kıt‘a bağ yerinden ve yine Kalemçayırı demekle ma‘rûf mevzi‘de bir tarafı Takyeci zimmî bağı ve bir tarafı Aleksi bağı ve bir tarafı Papa İstolo bağı ve taraf-ı râbi‘i tarîk-i âm ile mahdûd bağ yerini ve yine Bezirhâne karyesinde vâki‘ bir tarafı Savasto zimmî bağı ve bir tarafı vâdî ve bir tarafı Duka bağı ve bir tarafı tarîk-i âm ile mahdûd bir kıt‘a bağ yerimizde dahi her birimiz hisse-i şer‘iyye-i şâyi‘alarımızı bi safkatin vâhidetin otuz altı bin fıddî nakd-i râyic fi’l-vakt akçeye karındaşımız mezbûr Yanaki’ye tarafeynden îcâb ve kabûlü hâvî bey‘-i bâtt-ı kat‘î ile bey‘ ve teslîm ol dahi minvâl-i muharrer üzerine iştirâ ve tesellüm ve kabûl edip semeni olan mezbûrü’n-na‘t otuz altı bin akçeden her birimizin hissesine isâbet eden on sekiz bin akçeyi karındaşımız müşterî-i mezbûr Yanaki yedinden tamâmen ahz u kabz eylediğimizden sonra emlâk-i mezbûrede olan hisse-i şer‘iyye-i şâyi‘amızda alâka ve medhalimiz kalmadı, min ba‘d karındaşımız merkūm Yanaki’nin irsen ve şirâen mülk-i mahzıdır dediklerinde gıbbe’t-tasdîk kayd şud. Fî 21 min Ramazân sene 1081.
Şuhûdü’l-hâl: Ahmed Ağa b. Abdullah Serdâr, Mehmed Beşe b. Abdullah Serdâr, Ramazan Çelebi b. Şaban, Sofiyanos v. Kosta, Kürekçi oğlu Yorgi, Savafilo v. Hıristo, Apostol v. Seranda.
|