|
Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 87 Hüküm no: 77 Orijinal metin no: [16b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Bahçe Belgradı köyünden Koti bt. Yani’nin Toya v. Yorgi’ye ev satışı
Medîne-i Hazret-i Ebâ Eyyûb el-Ensârî -dâme fî rıdvâni’l-Bârî- a‘mâlinden Bahçe Belgradı nâm karye sâkinlerinden Koti bt. Yani nâm nasrâniye meclis-i şer‘-i hatîr-i lâzımü’t-tevkīrde işbu sâhibü’s-sifr Toya v. Yorgi nâm zimmî mahzarında ikrâr ve takrîr-i kelâm edip karye-i mezbûrede vâki‘ olup bey‘-i âti’z-zikrin sudûruna değin silk-i mülk-i sahîhimde münselik emlâkimden bir tarafı Yanaki mülkü ve bir tarafı Kasako mülkü ve bir tarafı diğer Yanaki mülkü ve bir tarafı tarîk-i âm ile mahdûd iki bâb tahtânî odayı ve bir ahırı ve eşcâr-ı müsmire ve gayr-ı müsmire bahçeyi müştemil mülk menzilimi mezbûr Toya’ya dört bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve tesellüm ve kabûl ve kabz eyledikden sonra mesfûrü’n-na‘t dört bin akçeyi yedinden bi’t-tamâm ahz u kabz eyledim min ba‘d menzil-i mahdûd-ı mezkûrda alâka ve medhalim yoktur müşterî-i mezkûr Toya’nın mülk-i müşterâsı olmuşdur mutasarrıf olsun dedikde gıbbe’t-tasdîk kayd şud. Fî 23 min Ramazân sene 1081.
Şuhûdü’l-hâl: Mehmed Çelebi b. Mustafa, Mehmed b. Mehmed, Hüseyin Çelebi Serbölük, Panayot v. Peroş, Todoş Yanaki.
|