|
Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 90 Hüküm no: 82 Orijinal metin no: [17b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ordu ile Belgrad’a gidip orada vefat eden Derviş Ali’nin veraseti
Husûs-ı âti’l-beyânı mahallinde ketb ve tahrîr için savb-ı şer‘-i enverden bi’t-taleb irsâl olunan Mevlânâ Salih Mehmed Efendi zeyl-i kitâbda mastûrü’l-esâmî müslimîn ile medîne-i Hazret-i Ebâ Eyyûb el-Ensârî -dâme fî rıdvâni’l-Bârî-de vâki‘ Câmi‘-i Kebîr mahallesinde sâkine -umdetü’s-sâlikîn, zübdetü’l-vâsılîn, mürşidü’t-tâlibîn, mürebbi’l-fukarâ, muhibbü’l-etkıyâ- Şeyh Şaban Efendi Hazretleri âsitâne-i sa‘âdet intimâlarına varılıp akd-i meclis-i şer‘-i şerîf olundukda sâbıkan Antalya dizdârı olup ordu-yı hümâyûn mahrûse-i Belgrad’da iken bi emrillâh intikāl-i dâr-ı bekā eden el-Hâc Derviş b. Abdullah nâm kimesnenin verâseti zevce-i metrûkesi Bedrimah bt. Abdullah ve Fâtıma nâm hâtunlara münhasıra olup kable’l-kısme mezbûr İsmail Çelebi dahi fevt olup verâseti vâlidesi mezbûre Bedrimah ile li eb ve üm kız karındaşı mezbûre Ümmügülsün’e ve li eb er karındaşı mezbûr Mehmed Çelebi ile li eb hemşîreleri mezbûrât Hatice ve Râbia ve Kerime’ye münhasıra olduğu şer‘an zâhir ve müte‘ayyin oldukdan sonra mezbûre Hatice’nin zevci ve tarafından husûs-ı âti’z-zikre vekîli olup vekâleti mezbûrenin zâtını ma‘rifet-i şer‘iyye ile ârifân olan Mehmed Efendi b. Ömer ve Receb Çelebi b. Şaban şehâdetleri ile şer‘an sâbite olan zevci müşârun-ileyh eş-Şeyh Şaban Efendi ile Bedrimah ile merkūm Ümmügülsün taraflarından kezâlik vekîli olup vekâletleri ma‘rifet-i şer‘iyye ile ârifân olup mahmiye-i İstanbul’da Başçı el-Hâc Mehmed mahallesinden Süleyman Bey b. Mehmed ve Sultan Çeşmesi semtinde sâkin İbrahim Bey b. Abdullah şehâdetleri [ile] şer‘an vekâleti sâbite olan Hasan Bey b. Veli ve mezbûr Mehmed Çelebi asâleten ve vâlidesi tarafından vekâleten mezbûr Râbia kezâlik asâleten meclis-i mezbûrda mûrisleri müteveffâ-yı mezbûr el-Hâc Derviş mahall-i mezkûrda vasiyy-i muhtâr nasb ve ihtiyâr eylediği sâhibü’l-kitâb fahrü’l-emâsil ve’l-eşbâh Mustafa Çavuş b. Mahmud mahzarında her biri bi’l-asâle ve bi’l-vekâle ikrâr ve takrîr-i kelâm edip mûrisimiz müteveffâ-yı mezbûr el-Hâc Derviş merkūm Mustafa Çavuş’u vasiyy-i muhtâr nasb etmekle fevt olduğunda muhallefâtını ordu-yı hümâyûn kadısı Ali Efendi ma‘rifetiyle bey‘ ve semeninden techîz ve tekfîn vasiyyeti edâsın görüp düyûn-i müsbetesi dahi yedinde olan mümzâ ve mahtûm hüccet-i şer‘iyye mûcebince edâ ve ashâbına teslîmden sonra yedine taksîm-i beyne’l-verese bin yedi yüz yetmiş altı akçe ile yirmi dokuz aded yaldız altını ve on aded sikke-i hasene-i eşrefiye ve bir lacivert taşlı sîm yüzük ve kırmızı kese içinde zolata ve bir mikdâr kâsid akçe bâkī kalıp hâlâ zikr olunan bin yedi yüz yetmiş altı akçe ile yirmi dokuz yaldız altın ve on şerîfi altın ve ol yüzük ve kese ve zolta ve kâsid akçeyi getirip bize tamâmen def‘ ve teslîm, biz dahi bi’l-asâle ve bi’l-vekâle alıp kabz eyledik husûs-ı mezbûra müte‘allika da‘vâdan mezbûr Mustafa Çavuş’un zimmetini ibrâ-i âm ile ibrâ eyledik dediklerinde gıbbe’t-tasdîk kayd şud. Fî 25 min Ramazân sene 1081.
Şuhûdü’l-hâl: Ahmed Efendi b. Abdurrahman, Mehmed Halîfe, Receb Halîfe b. Osman, Mehmed b. Mehmed, Hüseyin Bey.
|