.:: İstanbul Kadı Sicilleri ::.


Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671)
cilt: 29, sayfa: 89
Hüküm no: 81
Orijinal metin no: [17b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mustafa b. Abdullah’ın muhallefâtından beytülmâl hissesinin alındığı

Bi’l-fi‘l Büyük Haslar Subaşısı fahrü’l-akrân Mehmed Bey b. Abdullah meclis-i şer‘de Havâss-ı Aliyye kazâsı a‘mâlinden Terkos nâhiyesine tâbi‘ Birinci nâm karyede sâkine Ayşe bt. Veli tarafından tasdîka vekîl olup vekâleti nehc-i şer‘î üzre sâbite Süleyman b. Davud mahzarında ikrâr ve i‘tirâf edip müvekkile-i mezbûrenin zevci olup bundan akdem vefât eden Mustafa b. Abdullah nâm kimesnenin zâhirde zevcesi Ayşe bt. Veli’den gayri vâris-i ma‘rûfu olmayıp terekesinin rub‘ı zevcesine ve sülüs erbâ‘ı beytülmâle âid ve râci‘ olmakla müteveffâ-yı mezbûrun muhallefâtı zevcesi mezbûr Ayşe’den da‘vâ ve taleb eylediğimizde beynimize muslihûn tavassut edip beni müvekkile-i mezbûre Ayşe ile iki bin fıddî râyic fi’l-vakt akçeye inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûru yedinden bi’t-tamâm ve’l-kemâl ahz u kabz eyledim min ba‘d müteveffâ-yı mezbûrun muhallefâtına müte‘allika da‘vâdan müvekkile-i mezbûrenin zimmetini ibrâ ve iskāt eyledim dedikde gıbbe’t-tasdîk kayd şud. Fî 25 min Ramazân sene 1081.


Şuhûdü’l-hâl: Ali b. Derviş, Mehmed b. Ali, Hasan b. Ali, Mehmed b. Mahmud, Dilaver [b.] Abdullah, Mehmed [b.] Eyüb.