|
Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 92 Hüküm no: 86 Orijinal metin no: [18a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Kiremitçi Süleyman Vakfı’na ait dükkânın biriken kiralarının ödenmesi
Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-de merhûm Kiremitçi Süleyman Çelebi Evkāfı’na bi’l-fi‘l mütevellî olan sâhibü’l-kitâb Mehmed Çavuş b. Abdülvehhâb mahfil-i kazâda medîne-i mezbûre a‘mâlinden Litros nâm karyede sâkin Yorgo v. Angeli nâm zimmî muvâcehesinde üzerine takrîr-i da‘vâ edip merkūm Yorgo bundan akdem karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd mülk menzil ve dükkânını mütevellî-i sâbıka her biri sekiz dirhem gelir yüz elli kıt‘a riyâlî kebîr guruşa alâ tarîki’l-istiğlâl bey‘ ol dahi mâl-ı vakf-ı mezbûr ile iştirâ ve ba‘de’t-tahliye ve’t-tekābuz senede yirmi dört guruş icâre ile merkūm Yorgo’ya îcâr ve teslîm ol dahi istîcâr ve tesellüm ve ol zamândan sitte ve semânîn ve elf Zilka‘desi’ne gelince altı senede müctemi‘ yüz yirmi beş guruşun üç senede icâresi altmış yedi buçuk guruşu mütevellî-i sâbıka edâ ve teslîm edip bâkī altmış yedi buçuk guruş üç sene icâresiyle asıl mâl-ı vakf-ı mezbûr ve târih-i mezbûrdan târih-i kitâb-ı şehr gurresine gelince on bir ay icâresi yirmi guruş ki cem‘an iki yüz otuz sekiz guruşa vakf-ı mezbûr için tevliyyetim hasebiyle merkūm Yorgo’dan taleb eylerim suâl olunsun, gıbbe’s-suâl deyicek gıbbe’s-suâl merkūm Yorgo cevâbında fi’l-vâki‘ vakf-ı mezbûr malından sekizer dirhem gelir yüz elli guruş riyâlî asıl ve altı sene icâresi altmış yedi buçuk guruş ile on bir ay icâresi yirmi guruş ki cem‘an iki yüz otuz sekiz guruş vakf-ı mezbûr için mütevellî-i mezbûra ile’l-ân zimmetimde lâzımü’l-edâ deynimdir deyû ikrâr edicek alâ mûcebi ikrârihî merkūm Yorgo mâl-ı vakf-ı mezbûru edâ ile ilzâm olunup kayd olundu. Fî 4 min Şevvâl sene [10]81.
Şuhûdü’l-hâl: Osman Ağa b. Habib, Mehmed b. Hasan, Mehmed Efendi b. Ahmed, Eyüb Çelebi, Mustafa Çelebi.
|