.:: İstanbul Kadı Sicilleri ::.


Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671)
cilt: 29, sayfa: 93
Hüküm no: 87
Orijinal metin no: [18b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Yatağa mahkûm Hamlacı Mehmed Ağa b. Mustafa’nın yeğeni İbrahim Çelebi’yi oğlu için vasî tayini

İşbu sâhibü’l-kitâb İbrahim Çelebi b. Mehmed nâm kimesneye lâhıkü’l-beyân vechi üzre ba‘de’d-da‘vai’s-sahîhati’ş-şer‘iyye istişhâdi’ş-şer‘î sudûrundan sonra udûl-i ricâlden Ali Efendi b. el-Hâc Mehmed ve İmâm Ömer Efendi b. Ramazan ve Seyyid Hüseyin b. Mehmed el-Hallâk ve Arzuman Reis b. es-Seyyid Ali ve Mustafa Beşe b. Ali ve Hasan Beşe b. Abdurrahman nâm kimesneler li ecli’ş-şehâde makām-ı kazâya hâzırân olup isre’l-istişhâd Havâss-ı Aliyye kazâsı a‘mâlinden kasaba-i Hasköy’de Turşucuzâde Hüseyin Çelebi mahallesi sâkinlerinden fahrü’l-emâsil ve’l-akrân- Hamlacı Mehmed Ağa b. Mustafa nâm kimesne ile’l-ân marîz ve sâhib-i firâş olmağla hemşirezâdesi mezbûr İbrahim Çelebi b. Mehmed sulbî sagīr oğlu Ahmed Bey’in evân-ı rüşd ve hadd-i bülûğuna değin bi emrillâhi te‘âlâ ben kazâen dâr-ı bekāya intikāl eylediğimde bi’l-irsi’ş-şer‘î oğlum sagīr-i mezbûra intikāl eden emvâl-i mevrûsesini zabt ve ve her hâlini hıfz için bizim huzûrumuzda vasiyy-i muhtâr nasb ve ihtiyâr eyledi deyû her biri şehâdet-i sahîha-i şer‘iyye eylediklerinde merkūm İbrahim Çelebi dahi vesâyet-i mezbûreyi kabûl ve hizmet-i lâzımesini edâya ta‘ahhüd etmeğin mâ vaka‘a kayd şud. Fî 5 min Şevvâl seneti ihdâ ve semânîn ve elf.


Şuhûdü’l-hâl: Mustafa Reis b. Abdullah, Süleyman Çelebi b. Arzuman, Mustafa Beşe b. Abdullah, Ali b. Hasan, Hasan Bey, Mehmed b. Mahmud, Hasan b. Abdullah, Ahmed Çelebi.