.:: İstanbul Kadı Sicilleri ::.


Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671)
cilt: 29, sayfa: 96
Hüküm no: 92
Orijinal metin no: [19a-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Çatalca’da ölen Foti v. ( )’nın veresesinin bağ satışı ve borç tediyesi

Havâss-ı Aliyye kazâsına tâbi‘ Çatalca nâhiyesine tâbi‘ Kestanelik demekle ma‘rûf karyede sâkin iken bundan akdem mürd olan Foti v. ( ) nâm zimmînin verâseti zevcesi Eleni bt. Aleksi nâm Nasrâniye ile sulbî kebîr oğulları Hıristo Doli ve Polihroni nâm zimmîlere münhasıra idiği şer‘an zâhir ve müte‘ayyin oldukdan sonra merkūm Hıristo Doli meclis-i şer‘de li ebeveyn karındaşı işbu bâ‘isü’l-vesîka mersûm Polihroni muvâcehesinde ikrâr ve takrîr-i kelâm edip mûrisimiz, babamız hâlik-i mezbûr Foti’den bi’l-irsi’ş-şer‘î bize ve vâlidemize intikāl eden emlâkden karye-i mezbûrda vâki‘ bir tarafı İstirati mülkü ve bir tarafı yine mülk-i mevrûs bahçemiz ve bir tarafı Kara Nikola mülkü ve bir tarafı tarîk-i âm ile mahdûd beş bâb fevkānî oda ve altında ahır ve bi’r-i mâ ve fırını müştemil menzilden ve yine karye-i mezbûrda vâki‘ bir tarafı Kara Nikola mülkü ve bir tarafı Papas bahçesi ve bir tarafı menzil-i mezkûr ve bir tarafı tarîk-i âm ile mahdûd bahçeden on altı sehimden benim hisseme isâbet eden yedi sehim hisse-i şer‘iyye-i şâyi‘a-i mevrûsemi târih-i kitâbdan üç sene mukaddem birâderim merkūm Polihroni’ye kırk iki bin akçeye tarafeynden îcâb ve kabûlü hâvî bey‘-i bâtt-ı kat‘î ile bey‘ ve teslîm ol dahi vech-i muharrer üzre iştirâ ve tesellüm ve kabz edip semeni olan meblağ-ı mezbûrun otuz bin akçesini gāib ani’l-meclis Canko Mehmed’e zimmetinde edâsı lâzım otuz bin akçe deynimi emrim ile edâ ve bâkī on iki bin akçemi tamâmen karındaşım mezbûr yedinden alıp kabz edip menzil-i merkūm ve bağ-ı mersûmede alâkam yoktur dedikde mâ vaka‘a kayd şud. Fî 7 min Şevvâl sene [10]81.


Şuhûdü’l-hâl: Mehmed Beşe b. Abdullah, Mahmud Çelebi b. Mehmed, Sipâhizâde Mehmed Çelebi b. Ramazan, Hüseyin Çelebi b. Seferi, Nalbant Ramazan b. Abdullah, Makol v. Makri, Yorgo v. Ripga, Hıristo Doli v. Kösec, Yorgo v. Apostol, Dimitri v. Papas ve gayruhüm.